أزمة التقديم لرياض الأطفال بالجيزة| بين "سيستم معقد" و "الواسطة هي الأساس"
مع انطلاق موسم التقديم لمرحلة رياض الأطفال، عادت معاناة أولياء الأمور في محافظة الجيزة إلى الواجهة من جديد. طوابير أمام المدارس، مواقع إلكترونية تتوقف فجأة، وشكوى موحدة تتكرر في كل إدارة تعليمية: "قدمنا بدري ومفيش رد، وغيرنا اتقبل متأخر عشان عنده معرفة".
الواسطة.. البوابة الخلفية للقبول
في مدرسة تجريبية بالعجوزة، تقف أميرة.م منذ الصباح. لديها طفلان أحدهما في الصف الأول والآخر ينتظر دور رياض الأطفال.
"قدمت إلكتروني أول ما فتح. السن مناسب والمربع السكني. لما رحت أسأل قالولي العدد اكتمل. تاني يوم لقيت أسماء نزلت لناس مقدمين متأخر. عرفت بعدين إنهم جايين بتزكية من عضو مجلس" تحكي بحسرة.
المشهد يتكرر في الهرم وفيصل وإمبابة. أحمد س، أب لطفلة 5 سنوات، يقول: "رحت 3 مدارس. كل مدير يقول قدم نت. وموظف شؤون الطلبة يقول تعالى اسأل في المدرسة. في الآخر فهمت إن الكشوف بتتقفل من بدري واللي ليه ضهر هو اللي بيدخل".
التقديم الإلكتروني: عقبة جديدة
كان الهدف من المنصة الإلكترونية تسهيل الإجراءات وتقليل التكدس. لكن أولياء الأمور يصفونها بـ"التعقيد".
"الموقع بيفتح 10 دقايق ويقع. أكتب الرقم القومي يقول خطأ. قعدت أسبوع بحاول لحد ما دفعت لسايبر 250 جنيه" تقول منى ع من بولاق الدكرور.
ويضيف محمد ر من الدقي: "ناس كتير في منطقتنا أمهات وآباء ميعرفوش يتعاملوا مع النت. فبيضطروا يدفعوا أو يستنوا حد يساعدهم. ده غير إنك مش عارف ابنك اتقبل فين إلا صدفة".
المدارس والإدارات: غياب معلومات وتخبط
الشكوى الثالثة هي غياب الشفافية داخل المدارس. لا لوحات إرشادية، ولا موظف مختص للرد.
سارة ك من إمبابة: "نسأل عن التنسيق يقولوا لسه. نسأل عن الأوراق كل مدرسة لها طلبات مختلفة. حاسين إننا بنلف في دايرة". \
..من جانبها، أكدت مديرية التربية والتعليم بالجيزة أن التقديم هذا العام يتم بالكامل إلكترونياً لضمان الشفافية وتكافؤ الفرص، وأن الأولوية لسن الطفل الأكبر ثم للمربع السكني.
وقال مصدر مسؤول بالإدارة التعليمية بالعجوزة: "أي شكوى من وساطة يتم التحقيق فيها فوراً. الكثافات هي العائق الحقي. عندنا إقبال كبير وأعداد القاعات محدودة".
وأضاف مسؤول بمديرية الجيزة: "بنواجه ضغط على السيستم بسبب دخول مئات الآلاف في وقت واحد. فتحنا مراكز دعم في الإدارات لمساعدة اللي مش بيعرف يقدم. وبنأكد إن مفيش تقديم ورقي إلا بعد ظهور النتيجة الإلكترونية".
ويطالب أولياء الأمور بثلاثة أشياء: إعلان التنسيق والكشوف بشفافية، تخصيص خط ساخن للشكاوى، وزيادة عدد قاعات رياض الأطفال لاستيعاب الأعداد المتزايدة.
الكلمة الأخيرة كانت لسيدة من الوراق: "إحنا مش عايزين واسطة. عايزين حق ولادنا في مكان محترم وقريب. كفاية لف وتعب كل سنة".
