الفلوس راحت فين؟.. مفاجآت في واقعة سرقة 2 مليون جنيه من حساب طبيب
واقعة هزت مواقع التواصل الاجتماعي بعد سرقة مبلغ 2 مليون جنيه من حساب المدعو الدكتور صلاح المغربي في بنك مصر وقام نجله يحيى بنشر فيديو توضيحي للواقعة عبر صفحته الشخصية بموقع التواصل الاجتماعي «فيس بوك».
وانهالت التعليقات على الفيديو ضد البنك والخدمات المقدمة للعملاء من خلال وسوء تأمين الحسابات.
وقام مجددا نجل الطبيب بنشر تدوينة أوضح من خلالها أن البنك قدم له دعوة لدراسة المشكلة والعمل على حلها قال فيها: تلقيت اليوم دعوة كريمة من Banque Misr بنك مصر بخصوص الشكوى والتساؤل عن الأموال اللي تم الاحتيال على والدي وسرقتها من حسابه.
وتابع: وزي ما قلت كانت دعوة كريمة اتفق فيها الحضور على التعاون المشترك بخصوص القضية والشكوى في الشق المتعلق داخل البنك أو مع الجهات المختصة، وهو ده اللي إحنا كنا عاوزينه وبنطلبه من المقام الأول مش أي حاجة تاني التعاون والتفاهم والإجابة على استفساراتنا والتعامل المحترم داخل منظومة الشكوى وخدمة العملا مع ضحية النصب وعدم تحميله المسئولية بالكامل.
أوضح: وإنه بطبيعة الحال التعامل الراقي والاحترافي مع الضحية وتبيين أوجه التقاضي وسبلها ليه بالتأكيد مسئولية من مسئوليات البنك (من ناحية المسئولية الاجتماعية مش بالضرورة القانونية أو الإدارية) والبنك مشكورًا في الأيام اللي فاتت كثف حملات توعيته بخصوص النصب الإلكتروني ووسايله بمناسبة شهر التوعية كمان عملوا زي ما لاحظنا سابقًا تعديل لتطبيق الإنترنت البنكي ورفعوا درجة الأمان فيه بشكل أفضل.
وأوضح: اتفق الحضور على أنه مش من مصلحة حد الإضرار بسمعة مؤسسة حكومية وطنية أو الإساءة ليها أو التشهير بسمعتها
خصوصًا في وقت يتصيد فيه أهل الشر لكل ما يتعلق بالبلد للإضرار بيها ووضحت للأساتذة الأفاضل اللي قعدت معاهم إني -ووالدي- مجرد مضرورين وضحايا لجريمة نصب إلكترونية احترافية لا نحب ولا نرضى أي إساءة لأي مؤسسة أو فرد وبمجرد ما مشكلتنا هتتحل مش هنملك غير الشكر لكل اللي تعاون معانا فيها من أصغر لأكبر واحد.
وتابع: بأكد إننا في المرحلة دي من التقاضي مش بنتعامل مع جهات غير مختصة وبنعتذر لوسايل الإعلام اللي تواصلت معانا
وكلنا أمل وثقة في الأجهزة المعنية في جلب الجاني للعدالة ورد الحقوق لأصحابها، الكتابة على الميديا شيء ضاغط ومستنزف ومرهق والتواصل اليومي مع عشرات ومئات المستفسرين مش شيء أحسنه وتسليط الضوء مش حاجة بنكون مرتاحين كأسرة معاها لكن اضطرارنا أولًا وكوننا أصحاب حق ثانيًا هو اللي ألجأنا لده الفترة اللي فاتت، بشكر بشكل شخصي كل اللي تواصل معايا الفترة اللي فاتت وكل اللي ساهم في توصيل مشكلتي وقعدتي مع الأساتذة في إدارة البنك اليوم كانت من ثمار ده بالتأكيد.
وأكد: أتمنى عمومًا منضطرش للجوء للسوشيال ميديا في أي مشكلة مستقبلية وإحنا بالتأكيد مش هنحب نعمل كده طالما ظهر لدينا بادرة طيبة لحسن النية.
وقام مجددا نجل الدكتور صلاح المغربي بتعديل التدوينة: «ده مش بوست معناه إن المشكلة اتحلت او أنه فيه وعد مضمون بحلها يا جماعة ده بوست لإظهار حسن النية كان عندي قبل انهاردة مشكلتين ان فلوسي اتسرقت وانه محدش بيسمعني او بيتكلم معايا، انهاردة حد سمعني واتكلم معايا ولسة فلوسي مرجعتش فلسة عندي مشكلة لكن واجب بيان إنه فيه مشكلة واحدة انحلت عشان أثبت للجميع إننا لما حد بيعبرنا ويقعد معانا بنوضح وبنذكر الكويس زي ما بنذكر الوحش ليس إلا شاكر لكل التعليقات المتفائلة وأنا متفائل طبعا».
وأوضح: لأن قدر الله كله خير وتوكلنا عليه لا حدود له ولأن البلد فيها قانون لكن القضية متحركتش بعيد عما كانت عليه امبارح أو الأسبوع اللي فات غير ما ذكرته في البوست إني قعدت مع البنك، كمان أنا مسبتش حقي ولا اتثبتت بكلمتين، والحق يقال اللي قعد معايا طالبني بكده أصلا أنا من أول لحظة وضحت إني لجأت للسوشيال ميديا لما حسيت إن كل الطرق التانية مقفولة وبما إنه دلوقتي فيه طريق مفتوح فهنخلي خيار السوشيال ميديا دلوقتي on hold.
وفوجئ اليوم الدكتور صلاح المغربي ونجله يحيى بشكوى مقدمة من بنك مصر بتهمة نشر أخبار كاذبة الغرض منها تشويه سمعة البنك والإصرار بمصالحه. وعلى الفور تقدم أحد المحامين يدعي محمد السيد بطلب للدكتور ونجله بتطوعه الدفاع في القضية لاسترداد حقه من البنك.
