"لا يشرفني اللعب باسم مصر".. شروق وفا بطلة الشطرنج تفضح فساد الاتحاد: "يدار بالمصالح والإهانات"
أعلنت شروق وفا، لاعبة منتخب مصر للشطرنج، قرارها التوقف عن اللعب باسم مصر، وبدء إجراءات الانضمام لتمثيل إيرلندا دوليًا، رغم مشوارها الرياضي الطويل الذي توّجته بأكثر من 20 ميدالية ذهبية على مدار 15 عامًا.
شروق وفا تكشف سبب توقفها عن اللعب باسم مصر في الشطرنج
قالت شروق وفا، عبر حسابها الشخصي على فيس بوك: "الناس القريبين مني كلهم عارفين أن هبطل ألعب شطرنج بإسم مصر، وبدأت خطوات تغيير الاتحاد لأيرلندا، طبعًا بعد تحقيق أكتر من 20 ميدالية ذهبية للبلد على مدار 15 سنة، ومكنتش ناوية أقول الأسباب في العلن، بس الاتحاد المصري للشطرنج مصمم في الانحلال وقلة الأدب، فأنا هنزلها".
محاولات لتشويه سمعة اللاعبين بدلًا من دعمهم
وأضافت: "منزلين خمسين مقال عشان يقولوا مختاروش حامد لبطولة إفريقيا تحت 20 عشان مستواه قل بجد؟، هو فيه اتحاد محترم ينزل مقال زي ده عن لاعب محققله بطولات المفروض يكون بيشجعه؟، والبطولة اللي قايلينها كمثال اللي هي العرب في المغرب هما مبلغين أن حامد مش هيسافر من قبلها أصلًا، وهو فارق في الريت عن زمايله ساعتها، وحامد طلع الرابع تحت 20 وديفيد تحت 18 مش نفس البطولة، وديفد واخد منها IM مش محتاج اللقب ولا حاجة، واحنا سكتنا ومكتنباش حاجة بس بيكذبوا عادي".
رفض إصدار قرار وزاري كاد يمنع مشاركة مصر في كأس العالم للسيدات
وأردفت شروق وفا: "وده طبعًا حصل بعد المهزلة بتاعة كأس العالم سيدات، اللي نائب رئيس الاتحاد الأستاذ جورج رفض يطلعلنا قرار وزاري على أساس أن فيها جوايز مالية فعادي اطلعوا على حسابكوا، ووقفنا في المطار مكناش هنعرف نسافر عشان جورجيا محتاجة تصريح أمني أو قرار وزاري، ومسافرناش إلا لما غيرنا التذكرة على السعودية".
بطولة إفريقيا في مهب الفوضى: تأجيلات عشوائية ومجاملات كادت تُقصي لاعبي المنتخب
وأكملت: وقبلها بطولة إفريقيا (أنا اللاعبة الوحيدة اللي خدتها 5 مرات) مدير البطولة كريم وجيه كل جولة كانت بتتأخر من ربع لتلت ساعة، على ما الضيوف ييجوا يعملوا النقلة الافتتاحية، وفي يوم اتأخرنا عشان باباه يتصور الصورة ديه، وأما في يوم بقى حصل حادثة في الطريق وكنا 3 لاعبين منتخب هنخسر، بالانسحاب بلغناه ورفض يأجل الجولة، وسبحان الله اليوم الوحيد اللي يبدأ في معاده وكان بيأجلها عشان لاعبين تانيين عادي، والبطولة كانت هتضيع مني بسبب كده أساسًا عشان وصلنا قبل الانسحاب بدقيقتين، بس عادي المهم هو وأهله يتصوروا في الحفلة".
وعود كاذبة وتخلٍ تام
واسترسلت بطلة مصر في الشطرنج: "وقبلها بطولة الزون في نيجيريا اللي بتأهل لكاس العالم، والGrand Swiss، واتأهلتلها كأعلى تصنيف في القارة، نائب رئيس الاتحاد وعدني بتغطية التكاليف، ولما تعبت هناك وجالي تيفويد ومتوفقتش طبعًا، قالي خلاص ما أنتي مجبتيش مركز هنكلم الوزارة نقولهم إيه ومرجعش أي تكاليف".
"اتحاد يرفض دفع الاشتراكات ويُكرّر الأخطاء منذ 15 عامًا
وزادت: "واتأهلنا بعد الأوليمبياد لكأس العالم للقارات، اللي مفيش غير 10 دول في العالم بتلعبه، والاتحاد رفض يطلعنا برضه عشان ميدفعش 1000 يورو اشتراك".
واختتمت شروق وفا: "ولا الأوليمبياد نفسها أصلًا اللي من 15 سنة بيطلع معانا إداريين يضرونا أكتر ما بينفعونا (دي عايزة بوست لوحدها والله)، وكل ده وعمري ما كتبت حاجة وكنا بنحاول نتفاهم معاهم وديًا بالكلام بس من غير أي فايدة لحد ما خدت القرار أن مش هلعب مع المنتخب تاني، بس خلاص فاض الكيل، المنظومة أساسًا غلط عشان لو منصب مفيهوش مرتب فمفيش حد أكيد فاضي يتطوع، ومش هيدخل فيه إلا لو بيطلع منه مصالح، بس مستوى الانحطاط الحالي غير مسبوق ولا يشرفني أن أمثل مصر مع وجود الاتحاد الحالي، وبالتوفيق".
