محمد بركات يكشف سبب عدم انضمامه للزمالك
كشف محمد بركات، نجم الأهلي ومنتخب مصر السابق، عن العديد من الكواليس في مسيرته الكروية سواء مع الإسماعيلي أو الأهلي، كما تحدث عن حقيقة انتمائه لنادي الزمالك.
وقال بركات في تصريحات مع الإعلامي معتز الدمرداش، عن بداية مشواره مع الأهلي: "جماهير الأهلي حاجة كبيرة، وهي اللي رجعتني للحياة لأن وقت انتقالي من قطر إلى الأهلي الموج كان عالي عليا والانتقادات كانت كتيرة، والكلام وقتها إني مخلص كورة وعيان والأهلي اشترى التورماي وشرب مقلب بسبب إني عندي الغدة ومش هاقدر أعمل حاجة".
وأضاف: "الموضوع كان صعب ووضع عليا ضغوط، لكن اللي خرجني كان مانويل جوزيه لما قعد معايا في الأوضة قبل أول تمرين ليا مع الفريق، وقالي إنت عارف أنا جبتك ليه؟ علشان أنت من أفضل اللاعبين في مصر وهتعمل إضافة للنادي الأهلي، وده كان قبل ما أنزل التمرين وفي أول ماتش جمهور الأهلي كان بيهز المدرج وهو بيغنيلي وقالي: بركات بركات والله بعودة يا بركات، فلما المدرب يتعامل معايا كده والجهور يستقبلني بالشكل دا، يبقى مفيش قدامي حل غير إني أقدم كل اللي عندي".
وعن الأهداف الأفضل في مسيرته، قال: "هدف التعادل في مرمى الزمالك بمباراة 3-3، لأنها مباراة قمة وكل فريق مش عايز يخسر والمباراة كانت 3-2 لصالح الزمالك، والناس دايما بتفكرني بيها وإن بركات مخسرش مباراة وهو بيلعب ضد الزمالك".
وتابع: "الضغوطات مش بتفرق معايا، أنا ماشي في شغلي واللي عايز يتكلم براحته، خاصة إن منذ انتقالي من السكة الحديد إلى الإسماعيلي عانيت من عدم الترحيب من الجماهير، كما وجدت صعوبات في المشاركة في البداية بسبب وجود أحمد حسن في نفس مركزي، وكنت بشارك في أوقات قليلة حتى تعرض حسن للإيقاف وحصلت على الفرصة".
وأضاف: بعد انتقالي إلى الإسماعيلي من السكة الحديد، سمعت أحد جماهير الدراويش يقول: هي المشرحة ناقصة قتلة، بسبب إصابتي بكسر في القدم خلال تلك الفترة.
وعن انتمائه للزمالك قال: "هذا الكلام انتشر من فترة وكنت بتضايق لكن حاليا مش باشغل بالي، لكن الفكرة إن كل عيلة فيها الأهلاوي والزملكاوي، وإحنا كنا الفرع الوحيد الأهلاوي وعمي الزملكاوي هو اللي اكتشفت موهبتي ولفت نظر والدي ليها".
واختتم: “عمي قال لازم ألعب في النادي وكانت تربطه علاقة قوية بحمادة إمام نجم الزمالك، وبالفعل كلمه علشان ألعب في النادي وإمام رحب وأخدنا كارت توصية، ولما روحت من مدينة نصر إلى ميت عقبة، والدي قالي المشوار هيكون بعيد عن البيت وهنشوف نادي أقرب فكان الاختيار على السكة الحديد، ودخلت مدرسة الكرة بعدها فريق الناشئين وتم تصعيدي للفريق الأول بعدها”.