أول تعليق من إدوارد على ظهور عزة سعيد في برنامجه
رد الفنان إدوارد على الانتقادات التي طالت برنامجه بعد ظهور الفنانة عزة سعيد في حالة غير متزنة، بسبب التصريحات التي أدلت بها خلال الحلقة، موضحًا أن استضافتها جاءت من باب الصداقة، ولرغبته في منحها فرصة للعودة إلى الجمهور وشرح سبب غيابها.
وكتب إدوارد عبر حسابه الشخصي على فيسبوك: "لما فريق الإعداد بلغني بوجود الفنانة عزة سعيد فرحت جدًا إني هستضيف فنانة زميلة وموهوبة غائبة بقالها فترة عن الوسط الفني، زي ما دايمًا بعمل في برنامج القاهرة اليوم وأستضيف كبار النجوم اللي أسعدونا بكرمهم وإحنا طبعًا برنامج هوا، ولما لقيت الضيفة عندها مشكلة احترمت ده ووقفت الفقرة قبل ميعادها احترامًا ليها، من غير ما أبين إني استغربت الكلام".
وأضاف: "هنحذف الفيديو من على صفحة القناة لأننا بنحترم كل الناس، وأنا باعتذر لو حد زعل مني، أكيد مكنتش أقصد حاجة وحشة، ونيتي صافية زي ما كل الناس تعرف عني إني دايمًا بحب وبادعم كل فنان".
ظهور عزة سعيد بعد فترة من الغياب
وفي وقت سابق قالت الفنانة عزة سعيد إنها لم تهن أي شخص خلال حديثها في مقابلة تليفزيونية، حيث تحدّثت عن المخرج يوسف شاهين الذي كان يرغب في التعاقد معها لأداء عدة أفلام، بالإضافة إلى تقديمها 20 فيلماً سينمائياً مع المخرج شريف عرفة.
وأوضحت عزة سعيد في تصريحات سابقة لـ«إيجبتك»: "أنا ماهجمتش حد في البرنامج، وقلت الكلام دا، ومش من حق حد يحاسبني على كلامي طالما ماغلطتش في حق حد".
انتقادات لـ عزة سعيد
في المقابل، انتقد عدد من المتابعين ظهورها في البرنامج الذي يقدّمه الفنان إدوارد ونانسي مجدي، حيث كتب أحدهم عبر صفحته الشخصية على موقع فيسبوك: "مش مصدق إن الإنسانية تجردت من الناس لدرجة إن قناة تجيب ممثلة واضح إنها مريضة نفسيًا ويقرروا يشتغلوها ويكملوا الفقرة علشان تكون مادة للتريقة والريند! البرنامج ده استضاف الفنانة عزة سعيد اللي قالت خلال الحلقة إنها كانت متفقة على بطولات من أول ما اتولدت عشان تعملها لما تكبر بعد 20 سنة".
وتابع: "ويوسف شاهين كان بيدور عليها عشان يشتغل معاها، وكانت متفقة على 20 فيلم لشريف عرفة، وخدت ملكة جمال مصر في دبي من سنة، ومن شهرين خدت ملكة جمال لبنان وهتسافر تستلمها في أمريكا، وإنها فازت بجوايز من مهرجانات في العالم كله، وليها 3 أفلام في السوق دلوقتي بيتعرضوا، وياسمين عبدالعزيز وغادة عادل ومنى زكي كانوا بيختاروا الأفلام دي عشان هم أشهر منها".
وأضاف: "لكن هي كانت بطلة وبيتباع بيها، عندها 16 فيلم كل سنة ومحل ألماظ للأسف الشديد ماكنتش بتهزر، وكانت بتتكلم بجد واضح إن حلم البطولة والنجومية اللي ماوصلتش ليهم خلاها تتجنن، والموضوع مش كوميدي خالص إن حد يتاجر بحلمه الضايع، ويأسه ومرضه النفسي، كان ممكن جدًا بعد التصوير الفقرة ما تتعرضش أو الفنان إدوارد يشرح للناس اللي حصل لإخلاء مسئوليته عن اللقاء المهين ده حرام عليكم".