ليلة امتحان العرب.. بين مراجعات بـ400 جنيه وصرخات أولياء الأمور|خاص
قبل ساعات من انطلاق امتحان اللغة العربية للثانوية العامة، تحولت سناتر الدروس في القاهره والجيزة إلى خلايا نحل. لكن بدل الهدوء والتركيز، كانت الساحة مشتعلة أسعار الحص وغضب الأهالي.
المراجعة بقت استثمار
يقول "يوسف. محسن ، طالب بالصف الثالث الثانوي علمي: "حجزنا مراجعة ليلة الامتحان من أسبوع. السنتر جنب البيت قال الحصة بـ200 جنيه، بس المدرس المشهور في الدقي وصلت لـ400 جنيه للحصة الواحدة 3 ساعات. وملزمة الامتحان لوحدها بـ300 جنيه
وتضيف نورا حسين ، طالبة أدبي: المدرسين بيبيعوا توقعات. اللي يدفع أكتر ياخد ملزمة أقوى. إحنا بقينا بنذاكر بالفلوس مش بالمجهود
أولياء الأمور: مش قادرين نكمل
الغضب الأكبر كان من جانب الأهالي. أم سيف، ربة منزل، تقول: عندي اتنين ثانوية عامة السنة دي. دفعت 400 جنيه لمراجعة العربي و300 جنيه للملزمه. يعني 700 جنيه في مادة واحدة وفي ليلة واحدة. المرتب كله طار على السناتر من أول السنة
أما أبو مريم موظف حكومي، فيروي..رحت أحجز لابني لقيت قائمة انتظار. السنتر بيقول العدد اكتمل والسعر زاد من 250 لـ350 في آخر 48 ساعة. حاسس إننا في سوق مش في تعليم
بين الرفض والقبول
رغم الصراخ، يرى بعض الطلاب أن الأمر ضرورة. "كريم.ع" يبرر: "من غير مراجعة ليلة الامتحان هنضيع. المنهج كبير والوقت ضيق، والمدرس بيلم أهم النقاط اللي ممكن تيجي".
لكن السؤال اللي بيتردد بين الأهالي.. هو امتحان العربي بقى محتاج ميزانية لوحده؟" ومع دقات الساعة الأخيرة قبل اللجنة، تظل المعادلة واحدة: توتر الطلاب، وقلق الأهالي، وفواتير السناتر التي لا تنتهي.
