أول تعليق من إنجي عبد الله عقب إصابتها بورم في جذع المخ| خاص
أكدت الفنانة إنجي عبد الله، ملكة جمال مصر سابقًا، أنها راضية بقضاء الله وقدره بعد إعلان إصابتها بورم حميد في جذع المخ، موضحة أن معظم الأطباء في مصر وخارجها رفضوا علاجها بسبب خطورة مكان الورم، وأنها استنفدت جميع جلسات العلاج المتاحة.
وقالت إنجي عبد الله في تصريحات خاصة لـ«إيجبتك»: «أحب أن أقول طبعًا الحمد لله على أي شيء، الأمر كبير وصعب، خاصة في الوقت اللي أختي تعبانة فيه وفجأة رجع لي المرض مرة تانية وطبيعي تأخد بالها مني، وده موقف صعب بس يا سبحان الله ربنا فعلاً لما بيبعت أي محنة بيبعت معاها الصبر والرضا».
مرض إنجي عبد الله
وتابعت إنجي عبد الله: «أنا معنديش إكتئاب أو متضايقة ولا أي حاجة بس أنا بحاول أتعالج والمرض لما رجع لي تاني رجع أقوى من الأول بكتير بأعراض تخلي أي حد بيعاني في الحياة اليومية وعاوزة الناس تدعيلي واللي ربنا كاتبه هيكون وأنا راضية بقضاء ربنا مهما يكون».
وتصدرت إنجي عبد الله مؤشر البحث جوجل ومواقع التواصل الإجتماعي، حيث كتبت عبر حسابها الشخصي بموقع فيس بوك: «بقالى ستة شهور بحاول أتعالج للمرة الثانية من ورم في جذع المخ. هو ورم حميد، لكن موجود في أخطر مكان في المخ، للأسف كل الدكاترة في مصر وبره مصر، أساتذة في الأورام والمخ والأعصاب».
الحالة الصحية لـ إنجي عبد الله
وتابعت إنجي عبد الله: «الأطباء رفضوا يعالجوني لأنى أخذت كل جلسات الإشعاع والكيماوي المسموح بها سنة 2019. كنت فاكرة إن الموضوع انتهى، لكن للأسف رجعت لي أعراض أسوأ بكتير من الأول».
وأضافت: «فقدت الإحساس بالجانب اليمين من جسمي، عندي صعوبة في البلع، وكهربا في جسمي كله حتى مع أبسط الحركات أو حتى لما بحرك عيني. رجعت للمستشفى اللي اتعالجت فيها قبل كده بناءً على نصيحة الدكتور تامر النحاس، لكنه هو شخصيًا رفض يعالجني، والمستشفى طلبت مني أوقع إقرار أني مسؤولة عن أي مضاعفات لو اتعالجت، فمشيت من الخوف».
إصابة إنجي عبد الله بورم حميد في جذع المخ
وأوضحت أنها الآن تحت إشراف طبيب واحد فقط وافق على تجربة علاجات تلطيفية بسيطة لتحسين جودة حياتها على أمل حدوث معجزة، مؤكدة: «أنا مش بحاول أتعالج علشان متمسكة بالحياة، أنا بس تعبانة جدًا بقالي كتير وبادعي ربنا بحاجه واحدة: اللهم لا نسألك رد القضاء ولكن نسألك اللطف فيه».
وكشفت إنجي أن شقيقتها، التي ترعاها، تعاني بدورها من ورم في الرئة والمخ في مرحلة متقدمة، قائلة: «كنت فاكرة أني أنا اللي هخلي بالي منها، لكن دلوقتي هي اللي واقفة جنبي وتساعدني أعمل أبسط الحاجات اليومية اللي بقت مستحيلة لوحدي».
واختتمت حديثها بقولها: «حالتي بتتدهور كل شوية، وشفت حاجات صعب أوصفها. أنا راضية بقضاء ربنا الصعب عليّ، وعلى أختي، لكن الحياة بجد صعبة جدًا ومفاجآتها أصعب ادعولي».