ملكة جمال مصر السابقة تنشر تفاصيل مرضها .. وتطلب من الجمهور الدعاء

نشرت إنجي عبد الله ملكة جمال مصر السابقة  بوست عبر صفحتها الخاصة بموقع التواصل الإجتماعي الفيس بوك و كشفت من خلاله تفاصيل اصابتها بورم في جذع المخ للمرة الثانية فكتبت 

"عدى ٦ شهور بحاول اتعالج للمره الثانيه من ورم في جذع المخ  وهو مش سرطان ، هو ورم حميد ،لكن موجود في اخطر مكان في المخ، 
للاسف كل الدكاتره في مصر وبره مصر ، اساتذه في مجال الاورام والمخ والأعصاب ، رفضوا يعالجونى لانى اخدت كل جلسات الاشعاع والكيماوي المسموح ليا وللمكان الصعب ده سنه ٢٠١٩  وكنت فاكره خلاص انا تمام ، لكن للاسف رجعتلى اعراض اسوء بكتير من زمان
انا فقدت الاحساس بالجنب اليمين ،وصعوبة في البلع وكهربا في جسمى. كله لما بعمل اى حركه بسيطه حتى لما بحرك عينى، وفي حاجات تانيه كتير

حتى انا رجعت للمستشفى اللي اتعالجت فيه قبل كده ، بنصيحه من دكتور، تامر النحاس ، اللى هو شخصيا رفض يعالجنى و المستشفى طلبت منى امضى اقرار ، انى مسئوله تماما عن كل اللي ممكن يحصلى لو اتعالجت ، طبعا مشيت من الخوف دلوقت انا مع الدكتور الوحيد اللى وافق انه يجرب علاجات خفيفه تلطيفيه لمحاوله تحسين جوده الحياه مع اننظار معجزه  انا مش بحاول اتعالج علشان متمسكه بالحياه انا بس تعبانه جدا بقالي كتير  وبدعى ربنا بحاجه واحده بس.   
اللهم لا نسألك رد القضاء ولكن نسألك اللطف فيه 
الشخص اللي واقف جنبي وبيساعدنى ان اعمل ابسط الحاجات اليوميه اللي خلاص بقت مستحيله انى اعملها لوحدى  هى اختى اللي عندها ورم في الرئه والمخ مرحله رابعه  وكنت فاكره ان انا اللى هخلى بالي منها 
انا حالتى بتتاخر كل شويه  والمره دى شفت حاجات صعب انى حتى اوصفها انا راضيه بقضاء ربنا الصعب اوى اوى ليا ولاختى 
لكن  الحياه بجد صعبه جدا ومفاجئتها اصعب "

وطالبت عبد الله من جمهورها الدعاء لها لانها فى محنة صعبة .

يذكر أن إنجي عبد الله لعبت دور البطولة في فيلم “ بدر ” مع يوسف منصور بعد حصولها علي لقب ملكة جمال مصر عام 1999