رئيس برلمانية "حماة الوطن" ينفي ربط العضوية بالدفع المالي ويؤكد: "ادعاءات عارية تمامًا من الصحة"
نفى النائب أحمد بهاء شلبي، رئيس الهيئة البرلمانية لحزب "حماة الوطن"، بشكل قاطع ما تردد عبر وسائل التواصل الاجتماعي حول وجود شبهة رشوة انتخابية داخل الحزب، أو ربط الحصول على عضوية البرلمان بالقدرة المالية للمرشحين. ووصف شلبي ما ورد في الفيديو المتداول بأنه "كذب وافتراء وتشهير".
أوضح شلبي أن الحزب لم يرد على تلك "الأكاذيب" فور انتشارها، مؤكداً أن الواقعة كانت مرتبطة بخلاف فردي في إحدى المحافظات، وتولى أمين الحزب بالمحافظة التعامل معها.
وعن معايير الترشح داخل الحزب، أكد رئيس الهيئة البرلمانية أن تقييم المرشحين يعتمد على معايير واضحة، أبرزها النشاط الحزبي والمجتمعي.
وأشار في مداخلة تلفزيونية،إلى أن القدرة المالية للمرشح تُؤخذ في الاعتبار لضمان قدرته على تمويل حملته الانتخابية والدعاية الخاصة به، وليس كشرط للترشح.
وأضاف شلبي أن الحزب يتعامل مع ثلاثة أنماط من الكوادر: الكادر غير القادر مادياً، والكادر القادر على الإنفاق على نفسه، والكادر القادر على تمويل نفسه ودعم الحزب بالتبرع، مشدداً على أنه "لا يوجد تحت أي بند من البنود تحديد مبلغ مالي للتبرع".
وأكد أن التبرعات هي المصدر الرئيسي لتمويل الأحزاب، وأن الإنفاق على الحملات الانتخابية يظل مسؤولية شخصية تقع على عاتق المرشح.
وكانت حنان شرشار قد قالت في حوار مع «إيجبتك»:"أنا بشتغل في حزب حماة الوطن بقالى 6 سنوات، واشتغلت في انتخابات الرئاسة ونزلت الشارع، وكنت باصرف من جيبي، من غير ما أستنى أي مقابل، عشان الهدف كان واضح: خدمة البلد، مش مصالح شخصية".
وأضافت: "لكن لما جه وقت الترشح، لقيت نفسي مش موجودة.. لا اسمي اتكتب، ولا حد كلّمني، رغم إن شغلي معروف، ومجهودي واضح في الوراق".
"طلبوا مني 25 مليون جنيه علشان أترشح"
أشارت شرشار إلى أنها تواصلت مع قيادات الحزب بشأن الترشح لمجلس الشيوخ سابقًا، لكن الرد كان صادمًا:
"قالي صراحة: 25 مليون جنيه! قلتله ده مبلغ كبير، قالي (انتي مش عايشة في مصر؟)، وأنا عندي مقر وباصرف على الحملات، مش منطقي المبلغ ده أبدًا!".
وأكدت أنها حاولت التصعيد للمستويات الأعلى في الحزب، لكنها قوبلت بالتجاهل:
"رُحت للمركزية، محدش رد.. وكل ما أبعت لقيادات الحزب، مفيش رد، وكأننا مش موجودين، واللي يشتغل مابياخدش حقه".
المقاعد بتتباع.. والناس بتتسخر
وعن رؤيتها العامة لما يحدث، قالت: "الناس اللي اشتغلت على الأرض بيتسخّروا، والمقاعد بتروح لناس نازلة بـ(باراشوت)، مش مهم اشتغلت قد إيه ولا إيه أرضيتك الشعبية".
وأضافت:"فيه ناس من بره جايين يطلبوا الترشح على أماكننا وإحنا لينا سنين شغالين، ده ظلم بيّن، وبيقتل أي أمل عند الشباب".
اتهامات وتهديدات
قالت شرشار إن الحزب – حسب ما وصلها – رفع قضية ضدها بعد تصريحاتها، لكنها أكدت:
"حتى لو رفعوا عليا قضية، مش هسكت، أنا ماشوفتش بعيني بيع المقاعد، لكن اتقالي الكلام ده صراحة، وأنا مسؤولة عن كل كلمة".
وأضافت:"اللي حصل معايا حصل مع غيري.. بس في ناس بتسكت، وأنا مش من النوع ده".
رسالة للقيادات.. وللرئيس السيسي
بعثت حنان برسالة مباشرة لرئيس الحزب: "اتقي ربنا في الناس اللي سخّرتوها سنين، واللي اشتغلت عشان الكيان ده، مش علشان الفلوس".
كما وجهت نداءً إلى الرئيس عبد الفتاح السيسي:
"نفسي صوتي يوصل للرئيس السيسي.. أنا واخدة دورة في الرقابة الإدارية، وفاهمة يعني إيه فساد، ومتأكدة إن الرئيس مش ممكن يرضى بكده".
دعوة لمراقبة الأحزاب
طالبت شرشار بوجود جهة رقابية مستقلة لمراجعة أداء الأحزاب السياسية، قائلة:
"مفيش رقابة على اللي بيحصل داخل الأحزاب، وأشخاص بتترشح بشهادات مش واضحة، بيتقال عليهم دكاترة، ومحدش بيراجع، واللي بيشتغل فعليًا في الشارع ما بياخدش فرصته".
هكمل.. حتى لو مستقلة
أنهت حنان شرشار حديثها بتأكيد استمرارها في العمل السياسي:
"أنا ليا أرضية في الشارع، وعاملة شغل حلو، وهكمل حتى لو الحزب قفل الباب، مش فارق معايا التهديدات، ولا هاسيب حقي، واللي حصل ده مش هيمشي بسهولة".