أمينة توجه رسالة لـ تامر حسني:" تقوم لنا بالسلامة يا صاحبي"

وجهت المطربة أمينة، رسالة إلى نجم الجيل تامر حسني بعد تعرضه لأزمة صحية مفاجئة و خضوعه مؤخرًا لجراحة في الكلي، عبر حسابها الرسمي بموقع “فيس بوك”.

ونشرت أمينة صورة لـ تامر حسني وعلقت عليها قائلة:" ربنا يشفيك ويقومك بمليون سلامة يا تامر يا جدع يا محترم، اللي ميعرفش إن أنا أول مرة شفت تامر وهو صغنن وماسك جيتاره، هو ومحمد عدوية، كنا في مكتب الأستاذ صلاح الشرنوبي عشان كان بيعمل شريط اسمه شرنوبيات".

وتابعت أمينة: "المهم انى كنت من اللي بيقدموا نفسهم، وموهبتهم وكده، وساعتها اتفرجت على شريط فيديو تامر كان جايبه لأستاذ صلاح يفرجه عليه، الفيديو ده كان تامر بيغني فعلياً فى قناة النيل لايف أو دراما مش فاكرة بالظبط، واللي اديته الفرصة ساعتها الاستاذة سلمى الشماع، وكلنا انبهرنا بيه كلنا، وحسيت ساعتها إني قاعدة مع حد نجم أوي، ومشهور أوي رغم إنه لسه يا دوب بيبتدي".

واختتمت أمينة قائلة:" المهم اللي أنا عايزة أقوله إن تامر تعب أوي أوي أوي عشان يبقى نجم وبقى نجم كبير أوي أوي أوي، قدها يا تيمو، ويا رب تقوم لنا بالسلامة يا صاحبي يا اللي مافيش مرة قابلتني فيها إلا وكلك احترام وذوق، ومابتنساش أصلك وتعبنا من واحنا صغيرين.. ادعو لتامر يقوم بالسلامة لحبايبه ولولاده يا رب".

تامر حسني يطمئن جمهوره بعد أزمته الصحية الأخيرة 

عاد النجم تامر حسني إلى منزله بعد أن استقرت حالته الصحية، عقب إجرائه عملية جراحية ناجحة في ألمانيا، خلال الفترة الماضية وبعد جولة ناجحة في أوروبا.

كشف النجم تامر حسني عن آخر تطورات حالته الصحية من خلال منشور عبر حسابه على موقع تبادل الصور والفيديوهات «إنستجرام».

وقال تامر حسني:« مكنتش ناوي أتكلم في أموري الشخصية، بالعكس كنت باحاول أبان عادي بس بما إن الخبر تم تداوله.. أنا بقالي فترة بعاني وعندي أزمة صحية في الكلى ومن أيام احتجت للتدخل الجراحي الفوري، وتم استئصال جزئي من الكلية.. والحمد لله على كل حال.. شكرا لكل اللي بيحاول يطمن عليا شكرا لكل اللي دعالي وبيدعيلي».

تصدّر اسم الفنان تامر حسني مواقع التواصل الاجتماعي، بعد ما ترددت أنباء عن خضوعه لعملية جراحية، خلال الساعات الماضية .

وقال مصدر مقرّب من الفنان تامر حسني، إنه خضع لعملية جراحية خارج مصر خلال الأيام الماضية، في ألمانيا وهو حاليًا في انتظار نتائج الفحوصات الطبية.