وكيله يعترف: أحمد القندوسي على ردار الزمالك في ميركاتو الشتاء
كشف نصر يحي وكيل أحمد القندوسي نجم النادي الأهلي السابق حقيقة مفاوضات نادي الزمالك مع اللاعب الجزائري تمهيدا لانتقاله في ميركاتو الشتاء.
قال نصر يحيي وكيل القندوسي، فى تصريحات تليفزيونية: القندوسي حاليا في سويسرا وتحديدا في لوجانو ومفيش مفاوضات مع نادي الزمالك خالص ويمكن سمعت الفترة اللي فاتت عن حاجة بين قندوسي والزمالك، بس الحقيقة مفيش حد تواصل معانا من الزمالك.
تابع وكيل الجزائري أحمد القندوسي قائلا: “اللاعب قبل ما يروح لوجانو، كان في أي اتصال أو حاجة في مكالمة بسيطة بيني وبين كابتن أيمن الرمادي والدكتور حسام مندوه، استفسروا عن إمكانية ضم قندوسي وعن حالته في الوقت ده. قلت لهم إن قندوسي لسه في مرحلة التأهيل، وإن نادي سيراميكا هيتفاوض على الرقم اللي هو عايزه لو حصل انتقال”
أضاف وكيل أحمد القندوسي: الكلام كله كان مجرد اهتمام من يومها ما اتكلمناش خالص في أي حاجة.. كان مجرد اهتمام أيام أيمن الرمادي وهو في الزمالك.
واصل وكيل أحمد القندوسي: لا يوجد أي ديل معمول بين الأهلي وسيراميكا عشان ميروحش الزمالك ومفيش أي حاجة إسمها كده... أي لاعب، لو عايز يروح نادي في مصر، هو حر يختار.
وعن عرض الزمالك قال وكيل أحمد القندوسي: لو العرض مناسب وهو موافق، مفيش مانع خالص. الناس في سيراميكا وفي الأهلي محترمين جدًا، مستحيل يفرضوا أي حاجة على اللاعب.
وعن عرض الزمالك المالي قال وكيل أحمد القندوسي: لسه لوجانو محطش رقم رسمي.. هو نادي سيراميكا متمسك بيه جدًا لأنه جزء من الخطة الجاية، وقندوسي ابتدى يشارك في التدريبات الجماعية ولعب ماتش ودي 80 دقيقة وقدم مستوى كويس جدًا.. والمدرب اتكلم عنه بشكل إيجابي وقال إنه هيضيف للفريق كتير الفترة الجاية، فميش نية عنده للتفريط فيه.
وعن التفريط في أحمد القندوسي قال وكيله: لأ خالص مش في نية دلوقتي لكن لو نادي الزمالك قدر يقدم العرض المناسب ربنا ييسر واللاعب معندوش مشكلة ينضم للزمالك والزمالك نادي كبير وتاريخه كبير وأي لاعب هيكون شرف ليه ينضم له.. حتى لو إحنا كنا بنخطط نكمل في أوروبا، يبقى شرف لأي حد ينضم للزمالك.
فتح نادي لوجانو السويسري الباب أمام رحيل أحمد القندوسي الوافد الجديد للفريق الأول لكرة القدم بالنادي خلال ميركاتو الصيف الماضي من نادي سيراميكا كليوباترا.
لوجانو يرحب برحيل أحمد القندوسي
رحب نادي لوجانو السويسري وفقًا لمصدر داخل النادي عبر “إيجبتك”، برحيل القندوسي في يناير المقبل حال تلقيه عرضًا مناسبًا ويأتي ذلك في ظل عدم مشاركة اللاعب مع الفريق في أي مباراة حتى الآن بسبب إصابته الذي يخوض فترة تأهيل بسببها حيث كان يعاني من كسر في القدم من قبل انتقاله للنادي السويسري.
وكان هناك أكثر من نادي مصري يرغب في التعاقد مع القندوسي أبرزهم نادي بيراميدز والزمالك، ولكن الأخير يمر بأزمة مالية قد تدفعه لعدم التعاقد مع اللاعب.
وينتظر نادي لوجانو السويسري انضمام القندوسي لمنتخب الجزائر في كأس الأمم الإفريقية المقبلة، لمحاولة تسويقه ووصول عروضًا لرحيل اللاعب.