«الأوقاف» تحذر من انتشار الرشوة في المجتمع: «متعكروش الميه الطاهرة»

حذّرت وزارة الأوقاف، من  التعامل بـ الرشوة أو قبولها، وأنها لا تعتبر رزقًا للإنسان المسلم بل هي وزر عليه وأموال حرام تدخل بيته.

وقالت وزارة الأوقاف، في منشور على صفحتها الرسمية على «فيس بوك»: «اللي بيروّح بيته بفلوس رشوة.. بيروّح بفلوس حرام! مش كل جنيه دخل جيبك اسمه رزق... لو جالك بطريق حرام، يبقى اسمه وزر مش رزق».

خطورة الرشوة

تابعت: «اللي بياخد رشوة علشان يسهّل مصلحة أو يعدّي ورق، بيبيع ضميره وبيظلم غيره، وبيفتح باب الفساد بإيده، حتى لو لبس بدلة شيك وقعد ورا مكتب كبير».

وأضافت: «الرشوة شكلها مغري، فلوس سهلة، وكلام حلو، وشكر من اللي طلب الخدمة، لكن جواها سمّ، بياكل البركة، ويقلب حياتك نكد حتى لو الفلوس كتير».

واستكملت: «اللي بيرتشوا بيعكّروا المية الطاهرة، وبيبوّظوا العدل اللي بيقوم عليه أي مجتمع محترم، ومجتمع تنتشر فيه الرشوة... عمره ما يعرف لا استقرار ولا أمان».

عقوبة الرشوة

واستشهدت وزارة الأوقاف، بقوله وتعالى قال: ﴿وَلَا تَأْكُلُوا أَمْوَالَكُم بَيْنَكُم بِالْبَاطِلِ﴾ [البقرة: 188]، وقول سيدنا النبي: «لعن الله الراشي والمرتشي» وفي رواية: «والرائش بينهما».

ووجهت وزارة الأوقاف، رسالة قائلة: ياللي بتاخد رشوة… اتقِ الله، الفلوس دي هتدخل جسمك وجسم أولادك، وهتُسأل عنها يوم لا ينفع مال ولا جاه، ما تبقاش سبب في ضياع حق، أو تعطيل مصالح الخلق، ابدأ النهارده... ونضّف قلبك وإيدك، وارجع لضميرك، واشتغل بالحلال حتى لو قليل، وهتشوف البركة وهي راجعة تاني لبيتك.، اللهم اكفنا بحلالك عن حرامك، وأغننا بفضلك عمن سواك.