مش هسيب حقي.. تفاصيل أزمة اختبارات الوارنر وتعيين المباريات
كشف الحكم حسن رمضان الدرندلي أحد حكام منطقة بني سويف تفاصيل أزمته في اختبارات الوارنر وكواليس تجاهل لجنة الحكام الرئيسية فى اتحاد الكرة له فى ملف تعيينات المباريات.
قال الحكم حسن رمضان الدرندلي عبر الصفحة الشخصية بموقع التواصل الإجتماعي فيسبوك: مشكلتى بإختصار شديد أنا دخلت اختبار وارنر لحكام الدورى الممتاز فى شهر 7 وتم اخراجى عمداً من واحد من المعدين البدنيين ولما اتظلمت للخواجة قاللي هيراجع الكاميرات ولو ليا حق هيعد الاختبار ليا.
تابع الحكم حسن رمضان الدرندلي: الراجل نفذ وعده وخلانى أعيد الإختبار فى محافظتى بعدها ب3 أسابيع وكنت أنا فقط دوناً عن الجمهورية كلها بأمر منه وهو مشكور طبعاً على موقفه ده .
أضاف الحكم حسن رمضان الدرندلي: نجحت 28 - 8 ملعبتش بعدها لفترة وبعد إلحاح لعبت مباراة فى دورى المحترفين وتألقت فيها وكان الكلام ده يوم 12/ 10 بعد كده ملعبتش أى مباراة لا فى الدورى ولا المحترفين.
واصل الحكم حسن رمضان الدرندلي : ولحد النهاردة مفيش أى حد سائل فينا لا رئيس لجنة ولا مترجمه ولا نائب ولا أعضاء لجنة واتكلم واحد يرمى على التانى وتكلم التانى مش بيرد وحاجة آخر قرف ولما رد علي رئيس لجنتى أحد السادة الأعضاء قاله أصل حسن عمل الاختبار على العُشب.
وأكمل حسن رمضان الدرندلي: يعنى إيه الكلام ده يعنى مينفعش يلعب فى المحترفين أو الدورى على أساسى إنى ملعبتش الموسم ده أصلا فى المحترفين .. طب هو اللى قال يجرى فى بلده؟ لأ.. طب هو اللي قال يجرى على الزفت؟ لأ.
حكام النخبة
وأردف حسن رمضان الدرندلي: طب تميزه فى المواسم اللي فاتت لأ مفيش الكلام ده.. طب دا كان من حكام النخبة؟ معلش .. طب إحترامه الصغير قبل الكبير فى كل اللجان طوال 24 سنه تحكيم.. لأ مش مهم .. طب دا آخر سنه تحكيم.. معلش أصل الخواجة مش بيحب الحكام الكبار في السن وفضلت كده ولا حياة لمن تنادى.
وأسهب حسن رمضان الدرندلي: ولما تتكلم وتطالب بحقك تبقى شخص بتاع مشاكل .. أنا عموماً مش هسيب حقى ومش هبطل اتكلم ويا إما ألعب يا أبطلها بكرامه وطول عمرى مش بتاع مشى أمورك وإلعب أى ماتشات فى أى درجة وكل اللي يعرفنى عارف كده كويس عنى.
وقال حسن رمضان الدرندلي أيضا: ولما بطلت سنتين قبل كده كان برضوا بسبب اللى بتعرض له اليومين دول ومن نفس عضو اللجنة اللي خلانى بطلت سنة 2016 .. عموماً والله العظيم إنت ليك دايما نصيب فى دعواتى فى صلاتى إنت ولجنتك كلها وأسأل الله أن يجعلكم عبرة لمن لا يعتبر وإنى آخد حقى منكم دنيا وآخره وحسبنا الله ونعم الوكيل.
واختتم حسن رمضان الدرندلي حديثه قائلا: أنا عارف ان الكلام كتير لكن والله فيه تفاصيل تانية مذكرتهاش كلها آخر قرف.