شيكابالا يدعو لمباريات خيرية بين الأهلي والزمالك ويطالب بإنهاء التعصّب
واصل محمود عبد الرازق شيكابالا، قائد الزمالك السابق، توجيه رسائله الداعية لنبذ التعصّب وتعزيز الروح الرياضية، معربًا عن أمنيته في إقامة مباريات خيرية تجمع الأهلي والزمالك، تُخصَّص عائداتها لخدمة الرياضيين ودعمهم.
وقال شيكابالا خلال ظهوره ببرنامج "الكورة مع فايق" على قناة MBC مصر: "نفسي أشوف ماتشات خيرية بين الأهلي والزمالك، والاستاد يبقى كامل العدد، والإيرادات تروح لحاجات تخص الرياضيين. ونفسي كمان أشوف الأهلي بيلاعب المصري والمشاكل تتحل، والزمالك يواجه الإسماعيلي والدنيا تهدى".
موقف إنساني غير معلن
وكشف شيكابالا عن موقف إنساني جمعه بالإعلامي إبراهيم فايق خلال فترة كورونا، قائلاً: "في حاجة محدش يعرفها.. قابلت إبراهيم فايق في الجيم، وكان فيه لاعب في الأهلي الناس بتهاجمه بشدة. روحتله وطلبت منه يتكلم عنه كويس في البرنامج، لأن اللاعب ده مش بيعرف يلعب تحت الضغط، وأنا لعبت معاه. ومقولتش لحد قبل كده اللي أنا عملته".
رسالة للجماهير
ووجّه شيكابالا رسالة مباشرة للجماهير مطالبًا بوقف الإساءة للاعبين وأسرهم، قائلاً: "لما تشتم لاعب بأمه أو مراته هتستفيد إيه؟ بكرة ممكن متلاقيهوش في الملاعب. اللاعب ليه أهل ولازم نفهم ده وإحنا بنشجع. بلاش ندوس على الحتة المكسورة.. كلنا في لحظة ممكن نمشي".
انتقاد التركيز على القضايا بعد الوفاة
كما عبّر قائد الزمالك السابق عن استيائه من الاهتمام المتأخر بقضايا اللاعبين بعد تعرضهم لأزمات أو بعد رحيلهم، مستشهدًا بحالات مثل محمد صبري وأحمد رفعت، قائلاً: "إحنا بنقعد شهر أو اتنين نتكلم عن محمد صبري وبعدين الناس تنسى. طب لاعيبة الدرجات التانية والتالتة والربعة لو حصل لهم ظرف، أسرهم تعيش إزاي؟ محمد صبري معروف والناس هتقف معاه، لكن غيره؟ لازم المسؤولين يشوفوا ظروف اللاعبين تحت".
واختتم "بعد أزمة أحمد رفعت اتكلمنا شهر واتنين.. حد اتحاسب؟ حد عمل حاجة؟ لأ. بنستنى الناس تتوفى ونتكلم عنهم كويس. ليه ما ياخدوش حقهم وهما عايشين؟ يا رب يكون درس. الدنيا مش مستاهلة".
كواليس اللحظات الأخيرة في حياة محمد صبري
كشف معتمد جمال، نجم نادي الزمالك السابق، عن كواليس اللحظات الأخيرة في حياة الراحل محمد صبري، نجم “الأبيض” السابق، الذي وافته المنية اليوم، إثر حادث تصادم في منطقة التجمع.
وقال معتمد جمال، عبر قناة MBC مصر2: "محمد صبري شعر بألم في صدره وتواصل مع أسرته قبل الحادث وأخبرهم بعودته للمنزل لكنه شعر بالتعب مجددًا ما تسبب في الحادث الذي أدى لوفاته".