زيزو يغلق صفحة أزمته مع محمد صبري: ربنا يرحمك ويغفر لك
نعى أحمد سيد زيزو، لاعب الفريق الأول لكرة القدم بالنادي الأهلي، ببالغ الحزن والأسى، الكابتن محمد صبري نجم الزمالك السابق، والذي توفي إثر تعرضه لحادث سير .
ونشر أحمد سيد زيزو، صورة لمحمد صبري، عبر صفحته على منصة "انستجرام"، وعلق عليها قائلا :" لا حول ولا وقوة إلا بالله، البقاء والدوام لله، ربنا يرحمك ويغفر لك، إنا لله وإنا إليه راجعون".
على خلفية أحداث السوبر بين الأهلي والزمالك، وواقعة عدم مصافحة أحمد سيد زيزو، نجم النادي الأهلي، لهشام نصر، نائب رئيس نادي الزمالك، شن محمد صبري، نجم نادي الزمالك السابق، الذي رحل عن عالمنا اليوم في حادث سير، هجومًا ضاريًا على زيزو.
هجوم محمد صبري على زيزو بشأن أحداث نهائي السوبر
قال محمد صبري عبر برنامجه بقناة الزمالك: «تصرف أحمد سيد زيزو بعد المباراة وفي أثناء استلام الميداليات كان غير مسؤول بالمرة، وخليني أزوق الكلام وأقول تصرف غير مقبول، ولازم يكون في وقفة حازمة معاه».
وطرح محمد صبري تساؤلًا: «بسألك يا زيزو: استفدت إيه من اللقطة دي؟ قدام الناس كلها والعالم كله، إيه المكسب؟ إيه الإضافة؟ غير إنك كنت سبب في فتنة بين جماهير الزمالك والأهلي في المدرجات، وجو من الانقسام مالوش أي لازمة».
إساءة لصورة مصر أمام العالم
تابع نجم الزمالك السابق: لقطة تعمل لايكات وشير على السوشيال ميديا، لكن بتسيء لينا كلنا، بتسيء لصورتنا قدام العالم، إيه اللي كسبته من دا؟
أضاف محمد صبري: كل لاعيبة الزمالك والأهلي كانوا محترمين وملتزمين جوه الملعب وبعد الماتش، محدش خرج عن النص غيرك أنت.
استطرد: لازم أشيد بتصرف وليد صلاح الدين، مدير الكورة في الأهلي، الراجل بعد الماتش راح بنفسه يسلم على لاعيبة الزمالك ويواسيهم، لأنه راجل كبير ومحترم وعارف الصح من الغلط، وأنت المفروض تتعلم منه.
واصل: اتعلم كمان من أشرف بن شرقي، اللي بعد الماتش راح للجمهور واللاعيبة واعتذر، لأنه راجل محترم ومقدر العيش والملح والفضل اللي كان لنادي الزمالك عليه.
تعليق نجم الزمالك على أزمة زيزو
وأكمل نجم الزمالك السابق: «كنت نفسي أشيد بيك وأقول للناس شوفوا زيزو عمل إيه، ونخلي الأمور تهدأ، لكن للأسف أنت اخترت تمشي في طريق لوحدك، وتكمّل الترند وتولّع الدنيا أكتر».
واردف: «بدل ما تساعد في تهدئة الفتنة اللي بين الجمهورين، أنت حطيت بنزين عليها علشان تشعللها أكتر، وده تصرف غير مقبول من لاعب كبير المفروض يكون قدوة».
وأسهب: «الغريب إن في ناس بتقول زيزو معملش حاجة، واللوائح ما تعاقبوش.. إزاي ما عملش حاجة؟ ده تجاهل نائب رئيس نادي منافس قدام العالم كله، في بلد مستضيفة للبطولة! ده مش تحريض على الفتنة؟!».
وقال أيضا: الجمهورين اتخانقوا في المدرجات بسبب المشهد دا، وده مش طبيعي، لأنك بتبعث رسالة غلط للجماهير إنهم يقلدوا السلوك دا.
وأضاف: طيب يا زيزو، حتى لو أنت زعلان، البروتوكول بيقول تسلم وتمشي، دي أبسط قواعد الاحترام، هل كنت تقدر تعمل كده مع المهندس هاني أبو ريدة؟ أو مع أحمد دياب؟ أكيد لا، لأنهم ما كانوا هيعدّوها.
واختتم حديثه قائلا: فليه تعملها مع نائب رئيس الزمالك؟! الرسالة كانت سلبية، والتصرف مستفز، ومش في مكانه خالص.