عمر متولي يكشف ميول الزعيم عادل إمام الكروية

كشف الفنان عمر متولي، مفاجأة بشأن الميول الكروية لخاله الزعيم الفنان عادل إمام، ووالده الفنان المصري الراحل مصطفى متولي، بجانب الحديث عن علاقة الأخير بالراحل صلاح السعدني.

وقال عمر متولي- في تصريحات إذاعية- إن الزعيم عادل إمام يشجع النادي الزمالك في البداية ثم بدأ يشجع الأهلي من أجل نجله، بالرغم أنه ليس مهتمًا بالرياضة بشكل كبير.

وأضاف عمر متولي: "عادل إمام كان في البداية زملكاوي بالعند، وهو أصلًا ملوش في الكورة، لكن مع الوقت ابتدى يتابع، ولما لقي ابنه رامي من وهو طفل بيقول أهلي أهلي، تابع شوية وحب الأهلي جدًا، وبعدها بطل يحدد هو أهلاوي ولا زملكاوي عشان محدش يزعل”.

وتحدث عمر متولي عن العلاقة القوية التي جمعت والده والفنان الراحل صلاح السعدني، قائلا: “والدي كان كروي جدًا، كنت أصحى ألاقيه قاعد قدام المباراة والموبايل جنبه، وكل ما يحصل موقف في الماتش يتصل بصلاح السعدني من غير حتى ما يسلم عليه، يقوله ’شُفت اللي عمله اللاعب ده؟ ويقفل الخط.. ويقعدوا طول الماتش على الحال ده’”.

سبب ترك عمر متولي لمسرح مصر

وكشف عمر متولي، في وقت سابق، عن سبب قراره بالانسحاب من مسرح مصر مع الفنان أشرف عبد الباقي، وقال: “قعدت في مسرح مصر 5 سنين، وأشرف عبد الباقي مفيش أطيب منه، كنا ممكن نتخانق في البروفات ونرجع نضحك وننسى الخناقة.. لكن التجربة كانت مرهقة جدًا، كنا بنقعد نشتغل 16 ساعة في اليوم”.

وأضاف عمر متولي: “إحنا عملنا 25 مسرحية في السنة على مدار 5 سنين، وده رقم ضخم جدًا وبيستهلك وقت ومجهود وطاقة، عمالقة المسرح زي فؤاد المهندس وسمير غانم كانوا بيشتغلوا رواية واحدة سنين وحافظينها، إنما إحنا كل 3 أيام بنعرض رواية جديدة، وده كان جنون وضغط عصبي،  في الآخر قررت أسيب مسرح مصر لأني كنت داخل على فيلم من أحلام حياتي، وكمان كنت محتاج أرتاح، وبعدها بالفعل عدد المسرحيات قل”.