«نفسي أرجع أشوف».. بورسعيدي يكشف تفاصيل الاعتداء عليه بطلقات خرطوش

«نفسي أرجع أشوف ولو بعين واحدة». بهذه الكلمات التي يتخللها الألم تحدث “كريم م.ف” بعد تعدي “م.م.ح” عليه بسلاح خرطوش وإحداث إصابات خطيرة بكامل الوجه وأكثر من 120 ظرف خرطوش في منطقة المناصرة بغرب بورسعيد.

يروي كريم تفاصيل الواقعه لـ “إيجبتك” قائلا:

“أنا كنت ماشي في الشارع مروح البيت وفجأة لاقيت المتهم ومعاه اتنين كمان بيتهموني إني عامل صفحة علي التيك توك محتواها وحش ومسيء لأهل المنطقة السكنية اللي أنا فيها، حلفت لهم إن الصفحة دي مش بتاعتي، واني مش هعمل كدا صمموا على اني آجي معاهم، رفضت وقلتلهم هنروح سايبر عشان تتأكدوا أنها مش صفحتي، وفعلا دخلوا الجيميل وعرفوا أن أكونت التيك توك ده مش بتاعي، وبتاع واحد اسمه محسن ومشينا روحت البيت” .

وأكمل قائلا: “تاني يوم نزلت شغلي الصبح الساعه ٧ لقيتهم واقفين لي قدام العمارة كانوا ٣ منهم المتهم كتفوني وكانوا أخدوني ف مكان بعيد الناس شافوهم سابوني، وقاموا مطلعين الخرطوش وفرغوا فيا كل الطلقات اللي فيه”.

وتابع: “بعدها الناس أخدتني على المستشفي في تاكسي ولما وصلت كانت عيني الشمال اتصفت وخلاص مكنتش شايف حد بيها والتانيه كنت بشوف بيها بسيط دلوقتي خلاص ومعدش فيه امل اني أشوف تاني”.

وأكمل قائلا: “أنا بشكر قسم الزهور أنهم وقفوا جنبي وقبضوا علي المتهم أنا مش عايز أكتر من حقي لأني مأذتش حد ومعملتش حاجة وفي حالي”.

وقال: “أنا راضي بكل اللي ربنا ابتلاني بية بس أنا لسه شاب ومشفتش الدنيا ولو بتمني حاجة نفسي أرجع أشوف تاني ولو بعين واحدة”.

وقالت والدته باكية: “ابني خلاص اتعمي واللي عمل كدا لازم يدوق كل لحظة ألم ابني عاشها”.