نجوم الكرة عن أزمة المنصة: زيزو معاه حق.. وإدارة الزمالك: منتظرون العقوبات
شهدت الساعات الماضية ردود أفعال غاضبة داخل إدارة نادي الزمالك بسبب أزمة أحمد سيد زيزو نجم النادي الأهلي وعدم مصافحته هشام نصر نائب رئيس القلعة البيضاء في أزمة نهائي كأس السوبر المصري.
ردود الأفعال الغاضبة اتجاه تصرف أحمد سيد زيزو نجم النادي الأهلي في أزمة تجاهل مصافحة هشام نصر نائب رئيس نادي الزمالك فى مراسم تسليم كأس السوبر المصري أثارت جدلا واسعا فى الوسط الرياضي.
وتباينت آراء نجوم كرة القدم حول ازمة تجاهل زيزو مصافحة هشام نصر نائب رئيس نادي الزمالك فى مراسم تسليم كاس السوبر المصري.
تفاصيل أزمة زيزو ونائب الزمالك
أثارت تصريحات هشام نصر نائب رئيس نادي الزمالك جدلا واسعا بعدما تناول أزمة المنصة والتي شهدت تجاهل أحمد سيد زيزو نجم النادي الأهلي مصافحة نائب رئيس القلعة البيضاء.
كما تساءل هشام نصر نائب رئيس نادي الزمالك حول موقف المهندس خالد مرتجي أمين صندوق النادي الاهلي خلال أزمة المنصة مع زيزو خلال مراسم تسليم الميداليات فى نهائي كأس السوبر المصري.
قال هشام نصر عبر تصريحات تليفزيونية : تصرف زيزو في منصة التتويج كان غير محترم ومش منضبط، ولازم يتعرض للجنة الانضباط فورًا من غير حتى ما الزمالك يقدّم شكوى والبروتوكولات واضحة، ولازم يكون في احترام متبادل، واللي عمله زيزو لا يليق بلاعب محترف ولا باسم الأهلي.
تابع: أنا ما سلمتش عليه لأنه كان متعمد يتجاهل، رغم إني سلمت على كل لاعيبة الأهلي، والمفروض الأهلي واتحاد الكرة يكون ليهم موقف وقلت لخالد مرتجي إن تصرف زيزو قلة أدب، وقالي "معاك حق"، والغريب إنه تاني يوم نشر صور نفس اللحظة كأن مفيش حاجة حصلت.
أضاف: أنا قولت لمرتجي وقتها إن اللاعب ده معندوش ادب، وهو قالي "عندك حق"، لكن تاني يوم نزل نفس الصورة على السوشيال ميديا .. ايه يا خالد اللي بتعمله ده وعايز توصل لايه.. احنا اكبر من كده بكتير.
استطرد: ليه بتجرونا للمنطقة دي بدل ما تلومه .. خصوصا أن خالد مرتجي حصل معاه موقف مشابه السنه اللي فاتت من مريم مصطفى لاعبه كرة الطائرة وزعل .. احنا دايما بنقول الروح الرياضية لكن واضح انها مش جايبه همها ومش منها فائدة.
واصل: المبدأ بسيط جدًا الفتره الجايه: العين بالعين، اللي هيكون محترم معايا هكون محترم معاه، لكن لو في تجاوز مش هعدّيه ونيرة الأحمر لما حصل موقف مشابه في الطايرة كلمت اللاعبة وقالتلها لازم تسلمي عليه، لأن دي مبادئ وتقاليد نادي الزمالك.
أكمل: زيزو قال إنه عدم السلام بسبب قصه عقده مع الزمالك؟ أنا واثق إن جمهور الزمالك مش ساذج، الجمهور شايف كل حاجة وقرأ الفيلم وعارف الحقيقة، وهو عارف أنا كنت شايف الموقف إزاي وموقفي من البداية ومش عايز أدخل في تفاصيل، بس في فرق كبير بين "الطلب" وطريقة "الطلب" والاشتراطات اللي اتقالت.
أتم: زيزو لاعب محترم وكبير ومحدش يقدر يقلل من قيمته الفنية، بس أسلوب التعامل والحلفان والظهور في الصور كان بعيد عن الصدق. الموضوع خلاص اتقفل وعدينا المرحلة دي وأنا هشام نصر، لا عندي لجان إلكترونية ولا باشتغل على السوشيال ميديا، أنا راجل شغل وبشتغل عشان الزمالك وبس.
احترم إدارة الزمالك
شن محمد صبري نجم نادي الزمالك السابق هجوما ضاريا على المهندس خالد مرتجي أمين صندوق النادي الأهلي بسبب أزمة المنصة وتجاهل أحمد سيد زيزو نجم القلعة الحمراء فى مراسم تسليم الميداليات بنهائي كأس السوبر المصري.
قال محمد صبري عبر قناة الزمالك: الأغرب من دا كله تصرف خالد مرتجي، اللي كان واقف وشايف كل حاجة، وما عملش حاجة! في موقف زيزو ..هو ده المسؤوليه؟ أو هي دي المسؤوليه اللي حضرتك مكلف بيها من ملايين من الأهلاويه في العالم كله؟ طب يا أخي على الأقل احترم تاريخ الزمالك.
تابع محمد صبري: يا أخي على الأقل احترم إدارة الزمالك، وأنا هنا ما بتكلمش على إدارة موجوده دلوقتي أو إدارة كانت موجوده قبل كده أو إدارة هتبقى موجوده بعد كده، اسمها مجلس إدارة نادي الزمالك .. أي حد موجود، المجلس ده استقبلوكم استقبال الفاتحين، لو تفتكر فرشنا لكم الأرض.
أضاف محمد صبري: وقلنا وكنا فاكرين كلنا كزملكاويه إننا هنفتح صفحة جديدة بقى مع بعض، اللي هو الطبيعي بين الناديين، أكبر ناديين في الوطن العربي الأهلي والزمالك ولكن للأسف، للأسف اللي اتعود على الأساليب دي مش ممكن يتراجع عنها.
واصل محمد صبري: للأسف لما حضرتك تبقى واقف جنب نائب رئيس نادي الزمالك، يا تقول حاجة خير يا تسكت أحسن.. لكن حضرتك طالع بتصريح النهارده وتقول إنك بتدعم اللاعب؟ هو إنت هتدعمه في إيه تاني؟.
وأكمل محمد صبري: ما إنت مدعم اللاعب ده ومميزه عن كل زمايله من ساعة ما دخل لك النادي ده، إنت مديه دعم محدش واخده في مصر، ولا لاعب خده في مصر قبل كده .. فاسكت، هتدعمه على إيه يعني؟ بتدعمه على الفيسبوك على إيه؟ ما إنت مدعمه، مهننه، مروقه، مظبطه، ومديله خطوتين تلاته أربعة قبل كل اللاعيبة اللي موجودة.
أتم محمد صبري: إنت حر، لكن بلاش استفزاز، طب ما إحنا عارفين إن إنت بتدعمه، لكن هتدعمه في الغلط كمان؟ وإنت عارف إنه غلط؟.. على الأقل احتراماً للراجل والمسمى اللي جاي بيه، رئيس بعثة الزمالك، واقف جنبك.
واردف محمد صبري: بدل ما توقف اللاعب وتقول له "لأ، غلط كده"، بدل ما يكون في رد فعل لحضرتك مع تصرفه، لأ، بتطلع تدعمه تاني يوم كمان على صفحتك وتنزل الصور.. يا سيدي، ما الجمهور دايماً بينتقد وبيهاجم في مباريات القمة، ده عادي من زمان من السبعينات والتمنينات، بس مفيش مرة شفنا لاعب يرد بشكل مستفز كده قدام الكاميرات.
أسهب محمد صبري قائلا: هو حضرتك مسمعتش جمهور الأهلي كان بيقول إيه في الماتش نفسه؟ ولا كنت سامع اللي في التالتة شمال وسادد ودانك عن التالتة يمين؟!
وقال محمد صبري ايضا: أقول لك على حاجة، والله العظيم إحنا كزملكاويه لا منتظرين منكم رد فعل، لأن في مواقف قبل كده وقبل كده وقبل كده، سابقة بتأكد ليا أنا وبتأكد لكل الزملكاويه إن بين قوسين "القيم والمبادئ" اللي عندكم بتتشال وقت اللزوم.
واختتم محمد صبري حديثه قائلا: لما يكون الموقف عليك، ولو الموقف على هواك، بتحطها وتقول إحنا عندنا قيم ومبادئ..لكن اللي مش على هواك، لا شايف، ولا سامع، ولا بتتكلم.
محدش يعرف نية زيزو
قال الإعلامي أحمد شوبير عبر تصريحات إذاعية: بكل وضوح، كنت أتمنى إن زيزو يسلم على الكابتن هشام نصر نائب رئيس الزمالك، لكن في النهاية محدش يعرف نية اللي جواه، ولو بتسألني عن رأيي، كنت شايف إنه المفروض يسلم.
تابع شوبير: ممكن كمان الخلافات اللي حصلت وقت تجديد عقد زيزو تكون سبب في الموقف ده، وفي ناس قالت إن المهندس هشام نصر هو اللي ممدش إيده، لكن لأ، وأنت ماشي المفروض تسلم، ومع ذلك وبعيدًا عن اللقطة دي، زيزو قدم مباراة كبيرة جدًا وكان مثال للاحتراف والالتزام.
تصرف زيزو غير لائق
أعرب أحمد حسام ميدو عن استيائه من تصرف أحمد سيد زيزو لاعب الأهلي، بعد تجاهله مصافحة هشام نصر، نائب رئيس نادي الزمالك، عقب تتويج المارد الأحمر بكأس السوبر المصري.
وقال ميدو خلال ظهوره في برنامج أوضة اللبس على قناة النهار: «أنا زعلان من لقطة زيزو وتجاهله السلام على هشام نصر، لأنها كانت لقطة غير ضرورية، وكان بالإمكان أن يتصرف بطريقة أفضل تعكس احترامه لناديه السابق».
وأضاف ميدو: «مثل هذه التصرفات لا تضيف للاعب، وكان من الأفضل التعامل مع الموقف بهدوء وتجاوز الأمر».
إعتذار زيزو
انتقد محمد عبدالجليل، نجم الكرة المصرية السابق، تصرف أحمد سيد زيزو لاعب الأهلي، بعد تجاهله مصافحة هشام نصر نائب رئيس نادي الزمالك خلال مراسم تتويج الأهلي بلقب كأس السوبر المصري.
وقال عبدالجليل، في تصريحات تليفزيونية: "ما فعله زيزو خلال تسليم الميداليات خطأ، ورفض مصافحة هشام نصر تصرف غير مقبول، واللي حصل عيب. أطالب اللاعب بالاعتذار عما بدر منه، وعلى النادي الأهلي التدخل في الأمر لتوضيح الصورة وإنهاء الموقف بالشكل اللائق".
وأضاف عبدالجليل أن مروان عطية يستحق عن جدارة جائزة أفضل لاعب في بطولة السوبر المصري، مشيدًا في الوقت نفسه بأداء محمد شحاتة لاعب الزمالك الذي قدم مستوى مميزًا خلال البطولة.
زيزو معاه حق
أكد بشير التابعي، نجم الزمالك ومنتخب مصر السابق، أن موقف أحمد سيد زيزو لاعب الأهلي برفض مصافحة هشام نصر بعد مباراة السوبر المصري لم يأتِ من فراغ، مشيرًا إلى أن هناك شيئًا ما حدث بين الطرفين تسبب في هذا التصرف.
وقال التابعي، في تصريحات تليفزيونية، إن زيزو من أكثر اللاعبين انضباطًا داخل وخارج الملعب ولا يفتعل أزمات.
وتابع: "زيزو ميعملش كده من فراغ، وأكيد هشام نصر عمله حاجة لذلك رفض مصافحته، وأنا لو مكانه مش هسلم على هشام نصر.. زيزو موجوع من حاجة إحنا مش عارفينها"