أزمة المنصة ومصير رؤوف وقيد القداح.. 14 تصريحا مهمًا لنائب الزمالك
أثارت تصريحات هشام نصر نائب رئيس نادي الزمالك جدلا واسعا بعدما تناول أزمة المنصة والتي شهدت تجاهل أحمد سيد زيزو نجم النادي الأهلي مصافحة نائب رئيس القلعة البيضاء.
كما تساءل هشام نصر نائب رئيس نادي الزمالك حول موقف المهندس خالد مرتجي أمين صندوق النادي الاهلي خلال أزمة المنصة مع زيزو خلال مراسم تسليم الميداليات فى نهائي كأس السوبر المصري.
وجاءت أبرز تصريحات هشام نصر نائب رئيس نادي الزمالك عبر قناة المحور مع خالد الغندور على النحو التالي:
قال هشام نصر عبر تصريحات تليفزيونية : تصرف زيزو في منصة التتويج كان غير محترم ومش منضبط، ولازم يتعرض للجنة الانضباط فورًا من غير حتى ما الزمالك يقدّم شكوى والبروتوكولات واضحة، ولازم يكون في احترام متبادل، واللي عمله زيزو لا يليق بلاعب محترف ولا باسم الأهلي.
تابع: أنا ما سلمتش عليه لأنه كان متعمد يتجاهل، رغم إني سلمت على كل لاعيبة الأهلي، والمفروض الأهلي واتحاد الكرة يكون ليهم موقف وقلت لخالد مرتجي إن تصرف زيزو قلة أدب، وقالي "معاك حق"، والغريب إنه تاني يوم نشر صور نفس اللحظة كأن مفيش حاجة حصلت.
أضاف: أنا قولت لمرتجي وقتها إن اللاعب ده معندوش ادب، وهو قالي "عندك حق"، لكن تاني يوم نزل نفس الصورة على السوشيال ميديا .. ايه يا خالد اللي بتعمله ده وعايز توصل لايه.. احنا اكبر من كده بكتير.
استطرد: ليه بتجرونا للمنطقة دي بدل ما تلومه .. خصوصا أن خالد مرتجي حصل معاه موقف مشابه السنه اللي فاتت من مريم مصطفى لاعبه كرة الطائرة وزعل .. احنا دايما بنقول الروح الرياضية لكن واضح انها مش جايبه همها ومش منها فائدة.
واصل: المبدأ بسيط جدًا الفتره الجايه: العين بالعين، اللي هيكون محترم معايا هكون محترم معاه، لكن لو في تجاوز مش هعدّيه ونيرة الأحمر لما حصل موقف مشابه في الطايرة كلمت اللاعبة وقالتلها لازم تسلمي عليه، لأن دي مبادئ وتقاليد نادي الزمالك.
أكمل: زيزو قال إنه عدم السلام بسبب قصه عقده مع الزمالك؟ أنا واثق إن جمهور الزمالك مش ساذج، الجمهور شايف كل حاجة وقرأ الفيلم وعارف الحقيقة، وهو عارف أنا كنت شايف الموقف إزاي وموقفي من البداية ومش عايز أدخل في تفاصيل، بس في فرق كبير بين "الطلب" وطريقة "الطلب" والاشتراطات اللي اتقالت.
أتم: زيزو لاعب محترم وكبير ومحدش يقدر يقلل من قيمته الفنية، بس أسلوب التعامل والحلفان والظهور في الصور كان بعيد عن الصدق. الموضوع خلاص اتقفل وعدينا المرحلة دي وأنا هشام نصر، لا عندي لجان إلكترونية ولا باشتغل على السوشيال ميديا، أنا راجل شغل وبشتغل عشان الزمالك وبس.
قال هشام نصر أيضا: نفسي الجمهور يفهم إننا شغالين على بناء كل قطاعات النادي من أول وجديد، رغم الظروف الصعبة والأزمات اللي بنمر بيها. آه عندنا أخطاء وغلّطنا تحت ضغط، بس بنحاول نصلّح ونبني خطوة بخطوة والزمالك رغم كل مشاكله وضعفه، مازال واقف وبينافس، وبيكسب فرق كبيرة، مش سهل تكسب بطل إفريقيا مرتين وانت في الظروف دي.
مصير مدرب الزمالك
أسهب قائلا: ليه الناس بتسأل دلوقتي أحمد عبدالرؤوف مكمل ولا لأ؟ ما هو بعد ماتش بيراميدز كان الكل بيشكر فيه! الراجل محترم وعنده فكر كروي، وإحنا بنديله فرصته، ولكل حادث حديث.
أردف : عندنا اجتماع مجلس إدارة قريب، وهنقعد مع جون إدوارد ونتكلم بصراحة، لأننا لازم نكون واضحين مع الجمهور، إحنا بنبني فريق جديد وده محتاج أكتر من فترة انتقال واحدة.
وعن الصفقات قال هشام نصر: الصفقات بتيجي حسب إمكانياتنا المادية، وده طبيعي، بس بنوعد الجمهور إننا بنتعلم من أخطائنا، والفريق هيبقى أقوى إن شاء الله وأول خطوة دلوقتي فك القيد، وعيننا على لاعيبة معينة، وبإذن الله القيد هيتفك قريب.
وقال أيضا: لاعيبة الزمالك هما الأساس، وحسام عقده لسه فيه سنة ونص، وده ابن النادي ومستقبله معانا، ومحمد السيد نفس الكلام بنحاول نحافظ عليه حسب إمكانياتنا.
أزمة قداح الزمالك
وعن أزمة حسن القداح قال: عدم قيد القداح؟ احنا جبناه وعارفين إننا هنسجله في يناير .. بنسعى في حاجه تانيه نسجل بيها حسن قداح، وهنقدّم كل أوراقنا لاتحاد اليد، ولو تم قبول الأسباب هيكون مقيد رغم محاولات بعض الأندية التانية لضمه، بس اتحاد اللعبة لازم يطبق اللوائح، وأنا كنت رئيس اتحاد وعايش التفاصيل دي كويس.
واختتم حديثه قائلا: علاقتنا بجون إدوارد ممتازة جدًا، وهنقعد معاه وننسق كل حاجة، وكل اللي بطلبه من الناس: "سيبونا نشتغل شوية"، آه بنغلط، بس تحت ضغط كبير، وربنا يعيننا نرجّع الزمالك لاسمه الكبير اللي يستحقه.