أزهري لـ قارئ المتحف: أخطأت 7 مرات وهدفك الترند.. اتبسطت ولا لسه؟
علق الدكتور محمد العشماوي، أستاذ الحديث بجامعة الأزهر، على واقعة تداول فيديو لأحد الشباب وهو يقرأ القرآن بصوت عال داخل المتحف المصري الكبير.
وقال الدكتور محمد العشماوي، في منشور على فيس بوك، إن الشباب دائما هم ضحية الفكر المتطرف، فهذا شاب مسكين تأثر بأسلوب تغيير المنكر عند الجماعات المتطرفة والذي يعتمد على الاستفزاز والمكايدة، فيذهب لقراءة القرآن بصوت عال لكي ينكد على الناس في المكان الذي فيه معصية كنوع من الدعوة إلى الله وتغيير المنكر، قائلا "لما تيجي تعاتبه يقولك هو انا عملت حاجة غلط دانا كنت بقرأ قرآن بس".
ورد عليه الدكتور محمد العشماوي، قائلا: تعالى أما أقولك انت عملت حاجات غلط كتير، أولا انت مش قارئ وقرائتك غلط وفيها لحن كتير "أخطاء" وده مش مكان للقراءة بالصوت العالي، ومينفعش ترفع صوتك ولو بالقرآن في مكان فيه اهتمامات مختلفة ومينفعش تجبر الناس على سماع صوتك اللي هو ممكن ميكونش محبب بالنسبة لهم.
إهانة للقرآن واستخفاف به
كما تابع: ومش من حقك تفرض سماع القرآن بالطريقة دي على الناس دي إهانة للقرآن بتعريضه لعدم سماعه أو الاستخفاف به أو التشويش على الناس في مصالحهم ففاتك أدب عظيم من آداب تلاوة القرآن.
واستكمل: انت مش داعية والدعوة لها أصولها وقواعدها وفقهها وإلا ممكن تجيب نتائج عكسية، كمان انت كده مرائي وبتاع ترند واللي انت عاوزه حصل أديك اتشهرت باعم اتبسطت ولا لسه؟
وتابع العشماوي في رصد أخطاء الشاب: مش لازم يكون اللي عملته ده صح ممكن تكون عملته بناء على أوهام في عقلك فتخيلت إنك كده عملت عمل عظيم رغم كل الأخطاء دي، وفي النهاية دي النتيجة الطبيعية لتقليد قراء الصراخ والنغمات الحزينة والاستماع لدعاة التطرف على الفضائيات والسوشيال ميديا بدون وجود أي فكر مقاوم أو وجوده مع ضعفه.