«مش بفكر أتجوز وندمت بعد طلاقي».. أبرز تصريحات أحمد السعدني في «ABTALKS»
تصدر الفنان أحمد السعدني، على مؤشر البحث جوجل في الساعات الماضية وذلك بعد حلوله ضيفاً في برنامج «ABTALKS» الذي يقدمه الإعلامي أنس بوخش، مساء أمس الثلاثاء وخلال اللقاء كشف عن أسرار في حياته الشخصية والفنية أبرزها وفاة طليقته التي وصفها رحيلها بـ "اللطشة"، فضلاً عن ذهابه لطبيب نفسي في عمر الـ 16 عاماً بسبب ارتباطه بفتاة ولم يستطع الزواج منها، كما تحدث عن انزعاجه الشديد من شهرة والده الراحل صلاح السعدني في طفولته.. وفي التقرير التالي نرصد أبرز تصريحات الفنان أحمد السعدني.
تصريحات أحمد السعدني في برنامج «ABTALKS»
-كنت بحب واحدة جدا ومكنتش عارف أتجاوز رحت له مرة وماساعدنيش وأستمديت الفكرة من إن أبويا وأنا صغير وداني لدكتور واتبسطت.
-اتعلمت من وأنا صغير أطلب مساعدة من حد متخصص لو في حاجة مش قادر عليها، مش عيب، ورحت له مرة واحدة.
-وإحنا صغيرين كنت بنام أنا وأختي في أوضة واحدة وسريرها كان جنبه ورق حيطة عليه غابة مرعبة ومش مناسب للأطفال خالص وكنت مبعرفش أنام.
-نفسية الطفل غريبة جدا والمشكلة بتفضل ماشية معاك بقية عمرك.
-أنا بكره يوم عيد ميلادي وليلة عيد ميلادي الساعة 12 بالليل بقفل التليفون واختفي.
أحمد السعدني: بقفل تليفوني في عيد ميلادي
-وأنا عندي 7 أو 8 سنين عملت عيد ميلادي في البيت في شهر يوليو وعيد الميلاد بدأ الساعة 6 ولحد الساعة 8 في اتنين بس جم البيت.
-لدرجة إني نزلت وقفت في الشارع أستنى الناس وفي الآخر كان في 3 بس، ومن بعدها قررت مش هعمل عيد ميلاد.
-شهرة أبويا كانت مضايقاني وأنا صغير جدًا، وبخاف على أولادي من ده، بس معرفش هل هما حاسين باللي كنت حاسس بيه ولا لا؟.
-لما كنت بلعب تحت البيت أو في المدرسة، ألاقي واحد من بعيد يقول لي يا ابن الممثل، اللي هو عاوز إيه يعني، فمن وأنا صغير مبحبش فكرة الشهرة.
-والدي كان سايبنا نعمل اللي إحنا عاوزينه ولا يتدخل، أول ما قلت له أنا عاوز أمثل، قال لي أهم نصيحة إنك تصدق جدًا اللي أنت بتعمله، لو صدقت اللي بتعمله الناس هتصدقه.
أحمد السعدني: الزواج والخلفة رزق من ربنا
- أبويا رجل مثقف جدًا وشخص جميل، ويقول كلام مكنتش فاهم منه حاجة، لكن لما بدأت أكبر وأعدي الثلاثين بدأت أفهم أكتر وأحبه أكتر.
-الجواز والطلاق والخلفة رزق، وأنا مؤمن إن البني آدم ملوش اختيارات في حاجات كتير، وسايب نفسي زي اللي راكب الموجة ويحصل اللي يحصل.
-أصعب يوم في حياتي هو لحظة طلاقي حسيت إني كبرت 15 سنة وحسيت بالندم وتأنيب الضمير لكن تغلبت عليهم.
-مش بنصح حد يتجوز وهو صغير زي ما أنا عملت كنت عيل مش بشتغل وباخد المصروف وأي أخطاء حصلت مني كانت غير مقصودة لكن مكنش عندي خبرة.
أحمد السعدني يتحدث عن إنفصاله
-انفصلنا بعد أول شهر جواز وفكرة الجواز التاني مش بتخطر على بالي، مش عارف اتعقدت ولا إيه.
على جانب آخر يواصل أحمد السعدني تصوير مسلسله «لا ترد ولا تستبدل» الذي انطلق تصويره منذ أيام قليلة استعدادًا لعرضه حصرياً عبر إحدى المنصات الرقمية فور الانتهاء من تصويره ومراحله الفنية، وذلك ضمن أعمال الأوف سيزون المنتظر عرضها على المنصات خلال الأسابيع المقبلة.
تفاصيل مسلسل "لا ترد ولا تستبدل"
مسلسل "لا ترد ولا تستبدل" تدور أحداثه في إطار إجتماعى، يحمل قضية هامة، ويأتي من تأليف دينا نجم وسمر عبد الناصر، وإخراج مريم أبو عوف وإنتاج عبد الله أبو الفتوح فيما يشارك في البطولة بجانب دينا الشربيني وأحمد السعدني كلُ من: صدقي صخر، حسن مالك، فدوى عابد، جيدا منصور، وعدد آخر من الفنانين مقرر الإعلان عن أسمائهم بالتزامن مع عمليات التصوير.