مسلم: «فلوسي قربت تخلص واتعرضت لظلم كبير» | خاص

كشف المطرب مسلم عن معاناته الكبيرة بعد توقفه عن العمل منذ أكثر من عام، مؤكدًا أنه يعيش ضغوطًا نفسية وجسدية نتيجة الظلم الذي يتعرض له، وأن كل جهوده لحل مشكلته لم تثمر حتى الآن.

وقال مسلم في تصريح خاص لموقع “إيجبتك”: “أنا كنت رايح النقابة النهارده متفائل لحل مشكلتي، وفرحان إني هرجع أشتغل، واتفاجأت إن المعاملة مش كويسه وجابولنا الحكومة، مش عارف الظلم ده هيفضل فيه لحد إمتى، هما عايزني أسيب البلد، لو مفيش قانون يحميني  أنا هضطر أمشي”.

مسلم يروي تفاصيل أزمتة مع نقابة الموسيقيين

وأكد الفنان أنه مع كل هذه الضغوطات والظلم الذي يتعرض له إلا أنه يثق في القضاء، معلقًا: “المحكمة والقانون في صالحي، وبلدي بتقف في ضهر أي بني آدم، فنان أو مش فنان، أي بني آدم بياخد حقه في بلده، نفسي الناس تقف معايا لأن في جهات كبيرة متعرفش اللي بيحصلي ده من ظلم وقهر طول الوقت وإني أتمنع من شغلي”.

سبب تخلي الفنانين عن مسلم

أما عن أصدقائه في الوسط الفني، فقال معلقًا: “مفيش أي فنان وقف معايا ولا جاب سيرتي، الناس اللي فتحتلهم بيتي وساعدتهم وطلعتهم محدش فكر يرفع التليفون يطمن عليا همهم ياخدوا مكاني”.

واستكمل:  “ناس كتير طلعت على إيدي وساعدتهم مشوفتش حد منهم جنبي، لكن متأكد إن ربنا هيجيب حقي لأن الظلم ليه مخرج، النهارده الحكومة كانت بتجري ورايا عايزه تمسكني، بس أنا محدش يعرف يقربلي علشان معنديش حاجة غلط، ولا في حاجة تديني”.

وأضاف مسلم : “المحكمة والقانون في صالحي، وبلدي دائماً تقف إلى جانب أي إنسان، فليس هناك فرق بين فنان أو غير فنان، كل شخص له حقه. لكنني أحتاج دعم الجهات المسؤولة ليعرفوا ما يحدث ويعينوني على استعادة عملي”.

أسرة مسلم تتعرض للجوع بسبب أزمته

وأشار إلى أن الوضع أثر عليه وعلى أسرته، قائلا: “أنا رب أسرة وأعيل إخوتي وزوجتي وأولادي، ولو مشتغلتش ليوم واحد حياتهم بتتأثر، و كلهم هيجوعوا ما بالك الناس اللي ورايا، ده موضوع يكسر أي حد محدش يرضى بالظلم، أنا بقالي سنة كاملة مش بشتغل، والفلوس اللي معايا وبصرف منها قربت تخلص، رغم أن مشكلتي مع جهة العمل (شركة روتانا)  تم حلها بالفعل، ودفعت كل مستحقاتهم واستلمت العقد، وبعتوا خطاب للنقابة لحل مشكلتي”.

وأوضح الفنان أن محاولاته للتواصل مع المسؤولين لم تنجح أبدًا، قائلا: “ مصطفى كامل من أول الأزمة بتاعتي وأنا بتصل عليه مش بيرد، لا هو ولا ابنه، عارف إن في ناس كتير بتحاربني وكلهم عايزني أسيب البلد، لكن أنا مصر أخد حقي”.

واختتم تصريحاته بتأكيد ثقته في القانون والعدل، مؤكدًا أن ثقته في الله كبيرة، وأنه لا يرضى أبدًا بالظلم معلقا: “انا أريد من الجهات المعنية التطلع لمشكلتي ومساعدتي في حلها”.