« ليه مش أنا بني آدم».. عمر كمال يرد على منتقدي صُناع ألبومه الجديد

رد المطرب عمر كمال على الهجوم الذي تعرض له بعد  الكشف عن صُناع ألبومه الجديد  ومنهم الفنان رامي جمال، والشاعر تامر حسين، والملحن عزيز الشافعي، ومدين، وغيرهم.

وعلق  عمر كمال في برنامج ET بالعربي : كنت محظوظ أني تعاونت مع ناس لها اسمها ونجاحها الكبير، زي تامر حسين وعزيز الشافعي ومدين ومصطفى العسال وتوما ورامي جمال، ناس كتير جدًا الحمد لله ربنا كرمني وحققت حلمي أني اشتغلت معاهم.

 وأضاف : لما نشرت صوري مع صناع ألبومي الجديد زي رامي جمال وعزيز الشافعي ونادر حمدي، الناس قالت سقطة في تاريخهم، ليه مش أنا بني آدم ومن حقي أجرب؟، دي ناس سوية وشبعانة شهرة ونجاح وفلوس مفيش أي حاجة تجبرهم يشتغلوا معايا إلا لو شايفين فيا حاجة كويسة، وفي نجوم كنت بطمح أني أعمل معاهم دويتوهات وشبه الاتفاق حصل وبعد كده رفضوا، أنا مبسوط وده إداني تحدي أكبر وهثبت لهم أنهم على غلط وأني استحق، أنا لازم أجرب، اللي مالوش قلب مالوش رزق.

وقال : ألبومي اسمه عمر كمال الرهان كسبان، وإن شاء الله يبقى رزقه من اسمه، وده كان لوني الأساسي من البداية وزمان كنت بغني للغربة وبغني لـ أبويا، كان ليا تجارب كتير في الأول ولكن منجحتش النجاح اللي كنت منتظره علشان مبقاش كداب، وأنا كل 5 سنين في حياتي لازم أسأل نفسي وصلت لـ إيه وهتعمل إيه.

واختتم: وحصل الصدفة والخير من ربنا أن دي كانت السنة الخامسة ليا في الشعبي وعايز أجدد لوني الموسيقي، وربنا كرمني بـ فرصة كويسة أني أدخل من الباب الكبير لـ عالم البوب هيتنفذ بشكل رائع فانتهزت الفرصة وأخدتها.

من جانب آخر وجه الفنان  عمر كمال رسالة عاطفية مؤثرة للفنان محمد فؤاد، وذلك بعد الخلاف الذي وقع بينهما بسبب ألبومه الجديد على أثر خلافات مع منتج الأول له.

وقال عمر كمال عبر حسابه الشخصي على موقع “فيسبوك”: "أنت أستاذي وحبيبي وأنا مش انجح منك على اليوتيوب ولا أنجح منك في أي حتة، أنا مجيش أغنية جوه ألبوم من ألبوماتك". 

عمر كمال : كنت باستنى شرايط الكاسيت بتاعة محمد فؤاد

وأضاف موجها رسالته إلى محمد فؤاد: "أنت الوحيد اللي عارف أنا بحبك وبحترمك إزاي.. عندي 36 سنة منهم 30 سنة بحبك وبلف وراك حفلاتك في بلاد ربنا، وكنت فعلا بروحلك عند الاستديو وعند بيتك، وأنا سني 14 سنة، وكنت باستنى لحد الفجر عند محلات الكاسيت لحد ما الشريط بتاعك ينزل، واشترى النسخة الماستر اللي محفور عليها اسم شركة الإنتاج عشان أحس إني ساهمت في نجاحك وفي كتر المبيعات".

وتابع عمر كمال: "صوتك كان بياخدلى حقى من الدنيا، كان بياخدلى حقي من اللي سابتني، وكان ونس ليا في أثناء خدمتي في الجيش، وكان معايا في كل مراحل حياتي".