صديق المصور كيرلس صلاح يكشف ملابسات واقعة وفاته مع ماجد هلال.. تفاصيل
كشف أحد أصدقاء المصور كيرلس صلاح ملابسات واقعة وفاته هو والمصور ماجد هلال، وذلك من خلال حسابه الشخصي على موقع “فيسبوك”.
كتب صديق كيرلس صلاح: " معنديش فكره هعمل ده ازاي بس دلوقتي اقدر اكتب الكلام ده، لأنه خلاص الله استرد وديعته و تم دفن صحابنا و اخواتنا كيرلس صلاح و ماجد هلال و بدأت الأسر في استقبال العزاء صباح اليوم و لأن في المواقف اللي زي دي الإنسان مبيحاولش يواجه أي اتهامات عشوائية غير لما يتأكد تماماً و خصوصاً ان الموضوع اتقلب رأي عام و في الوسط الفني و لكن الأكيد أن كيرلس و ماجد ماتوا نتيجة إهمال.
صديق كيرلس صلاح: ماجد هلال فارق الحياة في لحظتها
وأضاف قائلا:" كيرلس و ماجد سافروا صباح يوم الاربع في اوردر تصوير في شرق التفريعه تبع احدي الشركات اللي مش هقدر اذكر اسمها حالياً عن طريقه استاذه مش هقدر اذكر اسمها برضه لحين انتهاء المحضر في النيابه و ده ايماناً مننا بـ ان عدل الله نافذ في السماء و في الأرض و ايماناً مننا بـ نزاهة القضاء المصري و هناك لأن مكانش معاهم درون و اتطلب منهم شوت واسع، حد اقترح انهم يطلعوا علي الونش الـ Crane، و الحقيقة المنتشرة علي السوشيال ميديا انهم وقعوا من علي الـ Crane غير حقيقيه, الحقيقه إن الـ Crane بالكامل نفسه اتقلب و وقع بيهم نتيجة مشكلة في المُعده في حد ذاتها في الوقت اللي كان البوم مرتفع بارتفاع 37 متر يعني ارتفاع اكتر من 12 دور وقعه كانت كفيلة انها تقضي علي حياة اخواتنا كيرلس و ماجد.
تابع قائلا:" ماجد للاسف فارق الحياه في لحظة الارتطام و هو بينطق الشهاده و توجهوا بيه علي المشرحه في بورسعيد و لكن كيرلس كان لسه فيه النفس بعد الارتطام و اتحركوا بيه علي مستشفي قنطرة شرق المركزية، السقوط كان حوالي الساعه 12 و ربع الصبح بينما وصولهم لمستشفي قنطرة شرق و تسجيل وفاة كيرلس كان الساعه 2:45 طبقا لتقرير المستشفي الرسمي في محضر النيابه الساعتين و نص دول كانوا فين و الطريق كله 30 دقيقة بين الموقع و المستشفي؟ فين مُعدات كيرلس و ماجد؟ فين كروت الميموري؟ فين تليفون ماجد؟".
صديق كيرلس صلاح: صاحبة الشركة بتحاول تسافر برة مصر
واستطرد قائلا:" للأسف الأستاذة اللي بتحاول تسافر دلوقتي بره مصر لما شافت كيرلس و ماجد وقعوا اتخضت و قعدت تعيط و تصوت و بسرعة خدت اللاب توب بتاع كيرلس اللي كان سايبه قدامها بتتفرج علي صور فيه و طلعت تجري علي عربيتها و ترجع للقاهرة .. مفكرتش انها تبلغ او انها تتصل بـ اهله حتي، أنا اتصلت بـ كيرلس علي سبيل الصُدفه الساعه 2 و ربع عشان يرد عليا شخص مجهول من المستشفي و يقولي كويس انك اتصلت احنا مش عارفين نفتح الموبايل ده و صاحب التليفون ده توفي في مستشفي قنطره شرق و ياريت تيجي حالاً، لو مكنتش اتصلت مكانش أنا او اهله عرفنا غير من الميديا هل دي طريقه تليق بـ اي شركة محترمه او ناس بتحترم ارواح الناس اللي بتشتغل معاها؟ لو حضرتك مش غلطانه, بتهربي ليه و تقفلي تليفونك؟
واختتم حديثه : إهمال أدي إني أقف أغسل صاحبي الساعه 3 و نص الفجر في وسط مكان نائي و هو عنده 29 سنه لمجرد أنه كان في أوردر تصوير مع حضرتك و حضرتك حتي مكانش عندك الشجاعة الادبية تبلغي حد من أهله و سوء نيه مع الاهمال لأن معداتهم اختفيت و كروت الميموري كمان ، علي العموم كُلنا ثقه في الله و في القضاء المصري ان حق كيرلس و ماجد هيرجع و ان عداله السماء اسرع من عدالة الارض كمان، و في انتظار قرارات النيابه اللي مازالت قيد التحقيق و تم استدعاء الاستاذ اللي بتمثل شركتها في مجال ال PR و ال Marketing ، ربنا يظهر الحقيقه و ادعوا لكيرلس و ماجد كتير لأن ده اكتر شئ هينفعهم دلوقتي".