مش هنتكلم في الأسعار.. مرشحة برلمانية تثير الجدل بعد جولة لها بين أهالي دائرتها

أثارت المهندسة شيماء عبدالعال، المرشحة لانتخابات مجلس النواب 2025، الجدل بعدما انتشرت محادثة لحوار بينها وبين إحدى السيدات في دائرتها الانتخابية، وذلك خلال جولة انتخابية للمرشحة.

وشهدت الجولة حوارًا صريحًا بين المرشحة وإحدى السيدات التي تناولت خلاله شكاوى المواطنين من تكرار المشكلات المعيشية رغم تعاقب النواب على مقاعد البرلمان.

وخلال اللقاء، بدأت السيدة حديثها قائلة: "إحنا كل مرة ننتخب حد ومشاكلنا مابتتحلش"، لترد المرشحة شيماء عبدالعال قائلة: "ماهي مابتتحلش ليه؟ عشان إحنا مابنختارش الصح، انتي من إمتى اخترتي حد من عندك وحل مشاكلك؟ أنا منك ومن منطقتك، وحاسة بمشاكلك وهحلها".

لن نتحدث في الأسعار 

وواصلت السيدة طرح تساؤلاتها حول الأوضاع الاقتصادية قائلة: "طب حليلنا الأسعار؟"، لترد المرشحة موضحة: "لأ، إحنا مش هنتكلم في الأسعار لأنها أسعار دولة، مش في إيدينا إحنا".

وأضافت السيدة: "طب وأنا أجيب منين إيجار وكهربا ومياه؟، وجوزي راجل أرزقي، أعمل إيه؟ الناس غلابة أوي"، لتوضح شيماء موقفها قائلة: "ديه مشكلة دولة، إحنا مش هنحل مشاكل الدولة، إحنا نحل مشاكلكم اللي هنا".

فسألت السيدة: "فين اللي هنا؟"، لترد المرشحة: "اللي هنا يعني الشوارع اللي انتي فيها، المدارس، الصحة، البطالة. لكن كلامك ده مش اختصاصنا".

وتابعت السيدة حديثها عن أزمة غلاء أسعار أسطوانات الغاز قائلة: "طب والأنبوبة اللي وصلت لـ350 جنيه؟"، فأجابت شيماء: "يا حبيبتي ديه مشكلة دولة"، كما اشتكت السيدة من سوء الخدمات الصحية قائلة: "روحت بابني امبارح الساعة 7 الصبح، رجعت بعد الضهر عشان مافيش دكاترة، كنت رايحة كويسة، رجعت عيانة.. أمال أنا هنتخبك ليه؟"، وتتابع : "هو انتي مين؟".

لترد المرشحة وهي قائلة: "أنا شيماء عبدالعال، رقم خمسة، رمز الغزالة، هتختاريني وهحل مشاكلك اللي تخص دايرتك".

أثار الحوار، الذي تم تداوله على نطاق واسع عبر مواقع التواصل الاجتماعي، تفاعلًا كبيرًا بين المواطنين، حيث علق البعض بقوله: " اومال هتحلي مشاكل ايه لما كل ده مش اختصاصك ايه هتصالحيها لو اتخانقت مع سلفتها ولا مع جارتها".

فيما علق آخر بقوله: " ناقص تقولها لأ اللي انتي بتقوليه ده سياسة.. واحنا مبنتكلمش في السياسة".