ياسر فرج: "زوجتي كانت مصابة بسرطان النخاع وقالتلي حببتني في الكانسر"
كشف الفنان ياسر فرج، عن تفاصيل مرض زوجته الذي كان سببًا رئيسيًا في ابتعاده عن الفن 5 سنوات، خلال استضافته في إحدى البرامج التلفزيونية.
ياسر فرج يكشف عن تفاصيل مرض زوجته
وقال ياسر فرج: “آخر أعمالي كانت مسلسل أفراح إبليس عام 2017، وبعدها اختفيت عن الساحة الفنية خمس سنوات كاملة، مش غياب فني بس، لكن غياب عن الدنيا كلها تقريبًا.. كنت عايش معاناة يومية بسبب مرض زوجتي”.
وتابع ياسر فرج: “في الوقت ده كنت في الخارج، ولما عرفت إنها اتصابت بالسرطان، رجعت فورًا مصر، رغم إننا كنا منفصلين وقتها، لكن رجعنا لبعض بشكل طبيعي، لأنها أم أولادي وكان لازم أكون جنبها وأسندها”.
و روى ياسر فرج تفاصيل تلك المرحلة الصعبة قائلاً: “كانت مصابة بسرطان في النخاع الشوكي، وعمرها وقتها 38 سنة بس.. بدأنا رحلة علاج طويلة جدًا، وكان المرض شديد ومناعتها ضعيفة، والأسوأ إن ده كله كان وقت الكورونا، يعني مكنش ينفع حد يقرب منها، لأن أي عدوى كانت ممكن تبقى خطر على حياتها”.
وأضاف ياسر فرج: “ربنا إداني قوة ما أعرفش جات منين، كنت بحاول أكون قوي قدامها وقدام أولادي، لأن لو كنت انهارت، كانوا هيضيعوا. كنت بعمل كل حاجة في البيت، وبقف جنبها لآخر لحظة، ورغم الألم، كنا دايمًا عندنا أمل إن ربنا هيشفيها، كانت في تحسن نسبي، لكن المرض رجع بشراسة.. دخلت العناية المركزة، وبدأنا علاج جديد قوي جدًا، لكنه كان صعب عليها.. جسمها انهار، وكل الوظائف الحيوية توقفت وحدة وحدة، في اللحظات الأخيرة، قالت لي جملة عمرها ما هتغيب عن بالي قالتلي انت حببتني في الكانسر.. الكلمة دي كسرتني، بس كانت شهادة منها إنها حست إني كنت معاها بجد”.
واختتم ياسر فرج حديثه قائلًا: “قالتلي قبل ما تمشي خلي بالك من الأولاد ومن أمي، وقالتلي أنا مسامحاك.. وأنا كمان سامحتها، وكنت عايز أقولها حاجات كتير، لكن الوقت خلص، وكانت دي إرادة ربنا”.
آخر أعمال ياسر فرج
شارك الفنان ياسر فرج في مسلسل “أفراح إبليس” بمشاركة كل من؛ جمال سليمان، عبلة كامل، ريهام عبدالغفور، أحمد سعيد عبدالغني، وآخرين وكان العمل من إخراج سامي محمد علي.