هيدي كرم تصدم النساء برسالة سن الـ 40

وجهت الفنانة هيدي كرم رسالة للنساء اللاتي تجاوزن سن الـ 40، أثارت الجدل حول السعي خلف الجسم المثالي، وإنقاص الوزن.

وقالت في فيديو نشرته عبر حسابها الرسمي على منصة “إكس”: “عزيزتي المرأة، سيدتي الجميلة فوق الأربعين، إذا وصلتي لهذا العمر وما قدرتيش توصلي للوزن المثالي اللي بتحلمي بيه من سنين، أرجوكي تنازلي عن الحلم ده”

وتابعت: “متجريش ورا القطيع وتلجأي للحقن أو الأدوية عشان تخسي بسرعة، لأنك ممكن تخسري وزن، بس هتخسري معاه حاجات أغلى بكتير زي الكولاجين، ونضارة البشرة، والدهون الطبيعية اللي بتدي الوجه حيوية وجمال”.

ووجهت حديثها للسيدات اللاتي تجاوزن سن الـ 40 قائلة: هتلاقي وشك بدأ يفقد امتلاءه، والخدود بتنزل، والجلد بيترهل، والملامح بتتغير، يعني ممكن جسمك يبان أنحف، بس وشك هيقول إن القطر عدى عليك وما سماش وهو بيعدي".

وأكدت أن هدفها ليس محاربة الرشاقة، بل الدعوة إلى التوازن والقبول الذاتي، قائلة:  لو عايزة تخسي، خسي 5 أو 6 أو حتى 8 كيلو بالكتير، علشان تتخلصي من النفخة أو الكرش الزايد شوية، بعد كده، اهتمي بالرياضة والأكل الصحي.

وتابعت: “أنا مش بتكلم عن الناس اللي عندهم سمنة مفرطة أو مشاكل صحية، أنا بتكلم عن الستات اللي جسمهم ممتلئ شوية المكلبظة الجميلة دي بعد الأربعين أعشقيها وافتخري بيها”.

وأكملت: “البسي اللبس اللي يليق على جسمك، مش اللي يضغطك ويدايقك، الموضة دلوقتي أوفر سايز، فاستغلي ده والبسي حاجات مريحة وأنيقة، خدي بالك من شعرك، من ضوافرك، اعملي ميك أب بسيط، واهتمي بجمالك الطبيعي، مش كلنا مخلوقين عشان نبقى رفيعين، في ستات جمالهم في امتلاء جسمهم، في منحنياتهم، في أنوثتهم الطبيعية، حبي نفسك، حبي سنك، حبي شكلك،  صدقيني، لو حبيتي نفسك الدنيا كلها هتحبك وأولهم جوزك”.

معايير الجمال بين البلوجرز 

وعلى صعيد آخر وجهت الفنانة هيدي كرم رسالة إلى ست البيت، متحدثة عن معايير الجمال، ومحاولة الفتيات وربات البيوت تقليد الفنانين، مؤكدة أن معايير الجمال المنتشرة بين البلوجرز والممثلين زائف وبعيدة عن الواقع.

اقرأ أيضا

هيدي كرم تثير الجدل بعد تصريحاتها الأخيرة: «إحنا اتربينا غلط»

هيدي كرم تكشف عن أمنية حياتها بعيد ميلادها وتتحدث عن المشاهد الجريئة.. خاص

وقالت في فيديو نشرتها عبر حسابها الرسمي على موقع إسنتجرام: "احنا مش حقيقي احنا ثلاث ارباعنا ايديت وفوتوشوب" مضيفة أن المظاهر الجمالية على السوشيال ميديا تعتمد على مجموعة من العوامل غير الطبيعية، مثل وصلات الشعر، والرموش، والأظافر، وصولا إلى عمليات التجميل والنحت والنفخ والشد والشفط احنا مش حقيقيين”.

وحذرت ربات المنازل من الانسياق خلف مقاييس الموضة، ومعايير الجمالي القاسية التي يتبعها المشاهير، لأنهن يعتمدن عليها كمصدر رزق، قائلة "اوعي تقارني نفسك بالست اللي أكل عيشها من ورا شكلها".

حياة ست البيت العادية

 وأوضحت هيدي كرم أن هؤلاء الأشخاص، مثل البلوجرز والإنفلونسرز والممثلين، عملهم مبني على شكلهم ولبسهم وما يقومون به، بينما هذا  النمط لا يمثل حياة ست البيت العادية.