شوبير يدافع عن نجله: الهجوم على مصطفى غير عادل.. وأثق في مستقبله
تحدث الإعلامي أحمد شوبير، نجم الكرة المصرية السابق، عن طبيعة علاقته بنجله مصطفى شوبير، وحقيقة تدخله في مسيرته الكروية، مؤكدًا أنه واجه أزمات عديدة بسبب اسم والده، لكنه اعتمد على جهده والتزامه داخل الملعب.
وقال شوبير في تصريحات لبرنامج يقدمه الإعلامي سيف زاهر: "مفيش حاجة بتمسكني من إيدي، ووجود مصطفى هدّاني شوية علشان ميدفعش فاتورة اسمي. نادرًا ما بتدخل في خناقة عشانه، لكن أحيانًا باضطر أعمل كده بسبب تصرفات البعض".
وأضاف: "ماحدش يقدر يتكلم عن تاريخ عصام الحضري، لكنه دايم الانتقاد لمصطفى ومش عارف السبب، ونفس الأمر بالنسبة لـ نادر السيد وطارق سليمان. أنا ساندت طارق وقت ما كان في المقاولون وساعدت ابنه علشان محدش يحاسبه على إنه ابن مدرب. فمش فاهم ليه الهجوم المستمر على مصطفى كل ما يشارك أو يتألق. في النهاية هو لاعب زي أي لاعب، طبيعي أدافع عنه، لكن لما يغلط أنا أول واحد بحاسبه".
وتابع شوبير حديثه قائلًا: "في ناس جوه الأهلي أوهمت محمد الشناوي إني وراء الهجوم عليه، وده غير صحيح تمامًا. أقسم بالله عمري ما انتقدته أو اتكلمت عليه بسوء. ممكن أعاتب مصطفى على خطأ، لكن عمري ما عملت كده مع الشناوي. وكمان أنا والشناوي مش بنتكلم كتير، بس دايمًا بقوله اللي بقوله قدامك هو نفس اللي بقوله وراك".
وأشار إلى أن العلاقة بين مصطفى والشناوي جيدة، موضحًا أن نجله ممتن لقائده وللدعم الذي تلقاه منه، لكنه بطبيعة الحال يطمح لأن يكون الحارس الأساسي للأهلي والمنتخب.
واسترجع شوبير لحظة لا تُنسى في مشواره قائلًا: "كنت مدعو لحضور نهائي كأس مصر في السعودية، ومصطفى طلب مني أروح لأنه هيشارك بدل الشناوي اللي كان مصاب. دي كانت المرة الوحيدة اللي بكيت فيها، خصوصًا بعد الفوز، والمباراة دي كانت سبب في انضمامه للمنتخب على يد التوأم".
واختتم تصريحاته قائلًا: "
مصطفى اتعرض لحملات هجوم عنيفة ودفع تمن اسمي في بعض المواقف، لكنه كمان استفاد منه في أوقات تانية. في النهاية، التزامه وجديته في التدريبات هما السبب الحقيقي في نجاحه واستمراره".