«مفيش مكان».. استغاثة من دفعة إعدادي بكلية الفنون الجميلة جامعة حلوان
استغاث طلاب وأولياء أمور دفعة إعدادي في كلية الفنون الجميلة بالزمالك جامعة حلوان، بالرئيس عبدالفتاح السيسي، بسبب ما وصفوه - التعامل التعسفي - من قبل إدارة الكلية والمطالبة بالتحويل من الكلية بداعي أن الطاقة الاستيعابية للكلية لا تتحمل هذه الكميات من الأعداد.
استغاثة طلاب فنون جميلة
وقال أولياء الأمور والطلاب في استغاثتهم: "من أول يوم إدارة الكلية اتعاملوا مع أولادنا بشكل سلبي، وفي أول محاضرة لقسم العمارة سمعوا كلمات محبطة زي حوّلوا، وامشوا، ومفيش مكان ليكم، وكأنهم السبب في زيادة العدد، مع إنهم التحقوا بالكلية رسميًا عن طريق التنسيق".
وأضافوا، "بدل ما الكلية تحل الأزمة، طلع رد رسمي يتعامل معاهم كأنهم درجة تانية ملهاش حقوق، ويقترح نقلهم بعيد عن مكان قيدهم، مع إن مكان الكلية كان عنصر أساسي في تحديد رغباتهم".
وتابعوا: "من غير ما يسمع رأيهم أو يراعي إن التحويلات اتقفلت، وفرص كتيرة كانت متاحة ومناسبة ليهم ضاعت عليهم، ده غير إن النقل هيفرض على الطلاب انتقال يومي طويل ومرهق لمكان غير مجهز، وده ظلم مضاعف. والأصعب إن مفيش أي تواصل أو وضوح من الإدارة بخصوص مصيرهم، وكأنهم مش أبناء الكلية زي باقي الدفعات".
وأشاروا إلى أن القرار "مش بس ظالم"، لكنه كمان مش هيحل المشكلة، لأن أساس الأزمة في قلة أعضاء هيئة التدريس بالنسبة لعدد الطلاب، والنقل مش هيغير ده، مضيفين أن الحقيقة إن المشكلة مش دفعة إعدادي، دي مشكلة إدارة الكلية اللي ما خططتش لاستيعاب الأعداد، وبتحاول النهاردة تحمل الفشل الإداري لدفعة بعينها".
واستكملوا: "من حقنا القانوني والأخلاقي نكمل دراستنا في نفس مكان قيدنا، زي باقي زملائنا في الدفعات الأخرى وبرامج الكريدت.. أي حل لازم يضمن المساواة والعدل بين كل الطلاب: زي تقسيم الحضور والأونلاين على جميع الدفعات لتوفير مكان للجميع، مش التضحية بدفعة واحدة واعتبارها درجة تانية".
واختتموا بمناشدة الرئيس التدخل العاجل لوقف هذا -التعسف - وحماية مستقبل أبنائنا، وضمان مبدأ تكافؤ الفرص والعدالة بين جميع الطلاب.
