جهاز الأهلي الجديد يغيب عن المران الأول لـ توروب
سبب غياب الجهاز المعاون لـ توروب في المران الأول مع الأهلي (خاص)
كشف مصدر داخل النادي الأهلي، عن تطورات وصول الطاقم المساعد للدنماركي ييس توروب، المدير الفني للفريق الكروي الأول بالقلعة الحمراء، إلى القاهرة.
وقال مصدر في تصريحات خاصة إن طاقم توروب المساعد لن يكون متواجدا في المران الجماعي للفريق غدًا الثلاثاء، بسبب وصولهم في وقت متأخر وسيقود المدرب التدريب الأول له مع الفريق بمفرده ومعه عادل مصطفى المدرب المساعد.
وتابع المصدر أن الطاقم المساعد سيصل إلى القاهرة خلال الساعات المقبلة، وقد يلحق بالمران الجماعي للفريق يوم الأربعاء.
هذا ويستعد الأهلي لمواجهة إيجل نوار البوروندي، يوم السبت الموافق 18 أكتوبر الجاري، في ذهاب دور الـ 32 من مسابقة دوري أبطال إفريقيا.
عماد النحاس يكشف كواليس التعامل مع علي معلول بعد إصابته الصعبة
وفي سياق آخر كشف عماد النحاس، المدرب السابق للفريق الأول لكرة القدم بالنادي الأهلي، والحالي لفريق الزوراء العراقي، عن تفاصيل محادثته مع النجم علي معلول، ظهير أيسر النادي الأهلي، عقب فترة غياب طويلة عن الملاعب بسبب إصابة صعبة.
وقال النحاس عبر تصريحات في برنامج "الكورة مع فايق": علي معلول واحد من أفضل المحترفين، وكان من أبرز اللاعبين في مركزه، لكنه تعرض لإصابة صعبة، وأنا كنت من الناس اللي اعتزلت بسبب الصليبي.
وأضاف المدير الفني السابق للأهلي، "أكيليس إصابة صعبة، مع عامل السن، وعدم المشاركة لفترة طويلة، كان عندي رغبـة أن الناس تشوفه في الملعب، وأنه يكون موجود وسليم، قعدت معاه قعدة طويلة، واتكلمنا في كل التفاصيل، وسمعنا بعض، وكلمته كمدرب، وقولت له أنا خدمت النادي قبل منك لفترة طويلة (2004-2010) وحصل لي نفس الظروف، والنادي وقف معاك ووقف معايا".
وأكمل: "قولت له أنا في الوقت الحالي بحاول بساعدك، في اختلاف في التعامل بين المدربين، وقولت له الناس عايزة تشوفك وأنت بشكل كويس.. وخرج من النادي وهو واقف على رجليه". في قرارات ممكن تكون مدروسة من بدري، ووجودي شهر مش هيحسم قرار بقاء معلول، لكن في الفترة الأولى معايا كان لاعبا محترفا تمامًا، لكن لقطة عدم مشاركته في ماتش البنك، أنا كنت عايزه يلعب جناح، وإنه يستلم ويلعب كورسات، ومفيش وقت والمباراة مهمة، وكنا في الدقيقة 80، لكن حسيت إنه مش جاهز للعب، بعدما أديت له التعليمات ولفيت لقيته مش واقف على الخط، ووقتها لقيت إمام عاشور لعب عرضيات بالشكل اللي أنا بفكر فيه وطارق مصطفى وقتها لعب بـ"هشام صلاح".
وزاد: “قولت خلاص لو إمام عاشور استمر على اللعبة دي خلاص يكمل عادي. فجأة إمام خد فاول واتعطلوا لكن بعدها طلبت من معلول يتواجد، وهنا كان رد فعله سريع، وتوفيق ربنا إننا خرجنا بالمكسب، يمكن لو مكسبناش كان رد الفعل اختلف. علي معلول مزعلش واتكلمنا تاني، لأنه كان عارف الملابسات، ومينفعش فيه تعادل".
واختتم: “قرار رحيل علي معلول مش قراري، ومعرفش اتاخد قبل كدا أم لا، ولكن النادي لو كان عايز يجدد له كان بالتأكيد هيكلمه من بدري".