ناقد رياضي يهاجم أسامة نبيه بعد خروج منتخب الشباب من كأس العالم

انتقد الكاتب الصحفي محمد فارس بشدة تصريحات أسامة نبيه، المدير الفني لمنتخب مصر تحت 20 عاماً، بعد لقائه مع الإعلامي إبراهيم فايق، في برنامج "قهوة فايق"، وهي ما اعتبرها دليلاً على ضعف الرؤية الفنية وسوء إدارة منتخب الشباب. 

وقال فارس في تغريدة عبر حسابه الرسمي على "إكس": "أسامة نبيه بيقول لإبراهيم فايق إزاي نكسب اليابان ده فريق مؤهل وعنده لياقة وامكانيات، إبراهيم بيقوله طيب ونيوزيلندا، بيقوله ما هي زي اليابان، تخيل دي أفكار وقناعات وشخصية المدير الفني اللي كان مسؤول عن جيل من الشباب".

وأكد على ضرورة محاسبة المسؤول عن تعيين نبيه في هذا المنصب، ذاكراً: "دي افكار وقناعات وشخصية المدير الفني اللي طلع على الهواء قبل كده يحكي ازاي وهو لاعب كان بيقول لمدافع الزمالك شييييل الكورة، وهو لاعب في المحلة، فيبقى بعد سنين مؤتمن على جيل من اللاعبين، لا لا لا ده مش فشل عادي ده فشل ممنهج، أقسم بالله اللي عَين أسامة نبيه لازم يتحاسب، وده أقل حاجة ممكن تتعمل".

وفي السياق ذاته، كد أسامة نبيه، المدير الفني لمنتخب مصر للشباب، رفضه وصف مشاركة المنتخب في كأس العالم الأخيرة بـ"الإخفاق"، مشيرًا إلى أن الفريق قدّم أداءً جيدًا في أغلب المباريات، لكن الحظ لم يكن إلى جانبه في اللحظات الحاسمة.

نبيه: الإخفاق كلمة ظالمة

وقال نبيه في تصريحات لبرنامج الكورة مع فايق: "أنا جاهز لأي سؤال من السوشيال ميديا، لكن معلش.. يعني إيه إخفاق؟ أنا برفض الكلمة دي تمامًا. إحنا لعبنا كويس، لكن التوفيق ماكانش موجود وقت ما احتجناه".

وشدّد المدير الفني على أنه يرفض أي اتهامات بالفشل، موضحًا: "أنا مش مدرب فاشل، ومينفعش حد يقول كده. أنا صعدت مع المنتخب الأول لكأس العالم، وليَّ تاريخ طويل في التدريب، فاللي يقولي فاشل يبقى مش متابع".

اتحاد الكرة كان يطلب المحاولة وليس التأهل

وتحدث نبيه عن تفاصيل المهمة التي تولاها، قائلًا: "لما مسكت المنتخب، الهدف من اتحاد الكرة كان (محاولة التأهل) لكأس العالم، مش التأهل نفسه، ومع ذلك إحنا لعبنا كرة كويسة جدًا، واللي شايف غير كده يبقى مش فاهم كورة".

وروى نبيه موقفًا يُبرز الروح العالية للفريق: "بعد ما فزنا في الدقيقة الأخيرة، اللعيبة فرحوا جدًا، لكن أول حاجة عملوها إنهم راحوا يواسوا لاعبي الفريق المنافس، رغم إنهم كانوا فاكرين إنهم اتأهلوا".