الزمالك بقي ضلمة| محمد صبري يكشف تفاصيل أزمات الفارس الأبيض
علق محمد صبري نجم نادي الزمالك السابق على الأزمات التي تمر بها القلعة الحمراء داعيا جماهير القلعة البيضاء بالإستمرار في مؤازرة الفارس الأبيض في قادم المباريات على المستوي المحلي والقاري.
قال محمد صبري عبر قناة الزمالك: الفترة اللي فاتت جمهور نادي الزمالك كان منقسم، لكن الاتنين عندهم وجهة نظر صح. في ناس قالت فيريرا يمشي بسبب تراجع الأداء والنتائج، وناس تانية قالت لأ يكمل تجربته ولازم نأكد إن الاتنين زملكاوية، كل واحد فيهم عايز مصلحة النادي، حتى لو وجهات النظر مختلفة.
مجلس الزمالك يجدد الثقة في فيريرا
تابع: في النهاية إحنا كزملكاوية هنلجأ لمين؟ لمجلس الإدارة برئاسة الكابتن حسين لبيب والمهندس هشام نصر، ومعاهم جون إدوارد المدير الرياضي المسؤول عن ملف الكرة ومجلس إدارة نادي الزمالك وجون إدوارد قرروا تجديد الثقة في المدير الفني البلجيكي يانيك فيريرا، والقرار اتاخد يوم الخميس.. خلاص.. القرار اتاخد، وعلينا إحنا كجماهير إننا ندعم ونساند الجهاز الفني، ده مش رفاهية، ده واجب على كل زملكاوي بيحب النادي.
أضاف: الشهر ده الزمالك عنده 3 مباريات مهمة.. مباراتين في الكونفدرالية ضد ديكيداها الصومالي (ذهاب وعودة).. مباراة في الدوري ضد البنك الأهلي .. كمان في شهر نوفمبر عندنا بطولة السوبر المصري من 6 لـ 9 نوفمبر، يعني ضغط مباريات كبير، والجهاز الفني مكمل.
استطرد: اللي مطلوب مننا دلوقتي كزملكاوية، مؤيدين أو معارضين، إننا نتجمع وندعم الفريق ونقف كلنا صف واحد، لأن المرحلة دي مش مستحملة أي تشتت والزمالك طول عمره تحت ضغط، وجمهوره كمان تحت ضغط، وكل مدير فني بيمسك نادي كبير لازم يعيش الضغوط دي، لكن إحنا دايمًا بنعدي.
واصل: دوري كمقدم ومحب لنادي الزمالك إني دايمًا أدي أمل، حتى لو الدنيا ضلمة لازم نلاقي شعاع نور نمشي وراه، لأن الزمالك دايمًا بيقوم بجمهوره وربنا سبحانه وتعالى.
واختتم حديثه قائلا: إن شاء الله الفترة الصعبة دي هتعدي، والعتمة اللي إحنا فيها دي هينورها جمهور الزمالك واللاعبين والجهاز الفني لما كلنا نبقى إيد واحدة ونبدأ من دلوقتي نركز في أول مباراة في الكونفدرالية يوم السبت الجاي، نروح ونشجع ونساند زي ما عملنا في بداية الموسم، وإن شاء الله النتائج هتيجي.