أبطال أكتوبر يروون حكايات المجد.. أسرار من المعركة وشهادة رجال صنعوا النصر | فيديو

في ذكرى انتصارات السادس من أكتوبر، تبقى الحكايات التي يرويها أبطال الحرب شاهدًا حيًا على زمن العزة والكرامة، زمن صنع فيه أبناء مصر معجزة حقيقية على ضفاف القناة، واستعادوا الأرض والكرامة بدمائهم وإيمانهم بالله والوطن.

من بين هؤلاء الأبطال، اللواء محمد صبري حسن، الذي بدأ حديثه بابتسامة يغلبها الشجن، قائلاً: حرب اليمن كانت صعبة جدًا، وربنا سترها علينا ورجعنا بسلام. بعدها دخلنا على حرب ٦٧، ودي كانت حرب غدر بكل المقاييس، وجوانا نار وغل مستنيين اليوم اللي نرد فيه القلم، ولما جه أكتوبر ٧٣، كان كرم كبير من ربنا، انتصرنا وردينا اعتبارنا، ورفعنا رأس مصر."

أما الرائد خليل علي عبد العزيز فاستعاد لحظات لا تُنسى من الساعات الأولى للحرب، قائلاً: كنا في مطار الأقصر الساعة ٢:٢٠ وقت الضربة الأولى، وكان معانا رائد طيار اسمه أحمد محمد الجندي، ولسه عايش لحد دلوقتي. جاله تليفون إن مراته بتولد، لكنه مكملش المكالمة، وطلع بطائرته في الطلعة الأولى. كمان كان معانا الشهيد مؤمن عياد ابن عمدة إهناسيا، استشهد في مطار شبراخيت لما الطيارة بتاعته اتصابت وهو بيحاول يساعد زميله… سقط بطل وهو على الممر. وكان معانا كمان اللواء الطيار أحمد عاطف عبد الحي، أول طيار يسقط طائرة فانتوم إسرائيلية بطائرته الميج 21.

خط بارليف أوهن من الخيط

وفي لحظة امتزجت فيها الدموع بالفخر، قال الرائد خليل: نفسي شبابنا دلوقتي يبقى عنده نفس حب الوطن والانتماء اللي كان جوانا وإحنا بندافع عن أرضنا.

ومن جهة أخرى، تحدث الرقيب شعبان كامل عبد القادر عن حرب الاستنزاف قائلاً: دي كانت أصعب فترات حياتي، كنا بنحارب كل يوم. لكن لحظة النصر دي لا تتوصف، حسينا إننا اتولدنا من جديد. كنا فاكرين إن خط بارليف ده مستحيل يتعدى، لكن طلع أوهن من خيط، ودي كانت فرحتنا الكبرى.

أما النقيب حشمت نصر فقد عبّر عن فخره قائلاً: إحنا خدنا حقنا وأكتر، عبرنا ورفعنا راس مصر، وكان كل ده ببركة (الله أكبر) اللي كانت بتزلزل الأرض تحت أقدام العدو.

كنا في رمضان وبجهز أكل لإخواتي المسلمين

ويختم الملازم أول شحاتة وهبة غبريال حديثه بابتسامة هادئة قائلاً: ماكنتش أعرف إننا هنحارب، كنا في رمضان وبجهز أكل لإخواتي المسلمين، وفجأة سمعت في الراديو خبر العبور. استلمت سلاحي ونزلت الخندق، وبعد أسبوع كان ليا الشرف أعبر يوم 13 أكتوبر، اللحظة دي عمرها ما تتنسي.