أوس أوس يكشف تفاصيل القبض عليه في إيطاليا: "دخلت أوضة كلها محبوسين"
فاجأ الفنان الشاب محمد أسامة الشهير بـ «أوس أوس» كواليس القبض عليه أثنا تواجده في مطار إيطاليا، أثناء ذهابه لتصوير فيلم رمسيس باريس بطولة هيفاء وهبي، الذي عرض عام 2023 في السينمات.
أوس أوس يكشف تفاصيل القبض عليه في مطار إيطاليا
وقال أوس أوس، خلال لقائه في بودكاست «فضفضت أوي»: «كلموني في فيلم رمسيس باريس وكان محمد ثروت عنده مشكلة مش هينفع يسافر وقالولي أرجوك تعالى، طلعت الفيزا وصبغت شعري أزرق وحضرت نفسي، ولأن الشينجن كنت مطلعها لإيطاليا سافرت على إيطاليا الأول وبعدها قلت أسافر داخلي لباريس، نزلت إيطاليا كان يوم 2 يناير مفيش حد في المطار غير أنا والناس اللي في الطيارة وكان وقتها كورونا».
وتابع: «وأنا داخل سألني شخص أنت ليه جاي هنا رديت أنا كل سنة باجي إيطاليا مكنتش عايز أقوله أني ترانزيت ورايح فرنسا عشان عايز آخد ختم دخول إيطاليا عشان تبقى الدنيا أمان وبعدها أسافر داخلي، سألني هتقعد فين قلت له صديقي مستنيني ورا المطار قالي أوكي، وجه ظابط وقالي اتفضل معانا وأنا مش فاهم في إيه وهما واخدين باسبوري، رحت معاهم، ودخلت أوضة كلها ناس محبوسة قلت سلاموا عليكوا يمكن ألاقي أي حد عربي مفيش وهما شكلهم مرعب وقعدت مش عارف هعمل إيه».
وأضاف: «جالي الظابط جايبلي ورقة كبيرة بالإيطالي المفروض أحلها، اللي اكتشفته إني جاي بفيزا سياحة وهما قافلينها فكل اللي كانوا معايا دخلوا لأنهم تعليم أو إقامة لكن أنا معايا سياحة، أنا طلعت الفيزا من القنصلية لأن الدنيا كانت قافلة وأخدتها سياحة، الظابط قالي كلم صاحبك اللي واقف برا قلت له إني معيش رصيد راح واخد موبايلي ووصله بإنترنت المطار وطلب مني أكلمه أونلاين».
وأختتم أوس أوس حديثه قائلًا: «كلمت الراجل اللي في القنصيلة اللي أنا رحت له هو مصري وبيتكلم إيطالي، قلت له أنا في إيطاليا قالي إيه اللي وداك إيطاليا أنت مش قلتلي عندك فيلم في فرنسا قلت له أيوه، قالي ما الشينجن دي بتدخل أي بلد، قلت له ما أنا خفت وقلت لازم آخد ختم، راح كلم الظابط وقاله إني ممثل مصري ورايح أصور في باريس وجاي أقعد يومين في إيطاليا عشان متعود، قالوله أوكي ومشيوا وبعدها الظابط رجع وختم لي الباسبور وقالي هما بس يومين».