طليق إبنة نجلاء فتحي يخرج عن صمته ويحكي تفاصيل إنفصالهم

خرج المخرج خضير محمد خضير طليق ياسمين أبو النجا إبنة الفنانة نجلاء فتحي عن صمته، ليرد على تداول البعض تفاصيل من حياتهما الشخصية، وذلك بعد وفاة ياسمين خلال الأيام الماضية، مؤكدًا أنه يمتلك الكثير من التفاصيل والأسرار المتعلقة بحياتهما الزوجية والانفصال، لكنه يرفض الخوض فيها احترامًا لخصوصيتهما.

حيث كتب على حسابه لشخصي على مواقع التواصل الإجتماعي “فيسبوك” وقال

" على فكرة انا بعرف ارد كويس وبعرف احكي كويس.. يعني أنا مستعد أحكيلكم عادي عن اسرار بيوتنا اللي ماحدش يعرفها غير المقربين مننا
- وممكن احكيلكم عن علاقتي الزوجية أنا وياسمين من بعد ما خلفنا ومن ساعة ما دكاترة فرنسا حذرونا من الحمل مرة تانية
- وممكن أحكيلكم عن بداية النهاية من سبتمبر ٢٠٢٤ بعد ١٨ سنة جواز 
- وممكن احكيلكم مين أجبرني أنا وياسمين على الطلاق بالعافية وايه السبب وليه ياسمين ماعرفتش تقف قدام القوة القهرية ديه
- وممكن احكيلكم مين اجبرها تسيب البيت ٤ اشهر وماترجعش غير لما نتطلق وبقيت أنا عايش لوحدي ٤ اشهر في بيتنا وبنتي عايشة ٤ اشهر مع امي وهي عايشة ٤ اشهر اجباري في بيت تالت.. 
- وممكن احكيلكم أنا وياسمين كنا بنتقابل في الشارع اللي ورا بيتهم في السر ازاي عشان ترجع البيت وفشلنا برضه بسبب القوة القهرية ديه

- وممكن احكيلكم عن صداقتي أنا وياسمين وعلاقتنا بعد الطلاق لما رجعت بيتنا وانا مشيت وقعدت جنب امي عشان كانت بتتعالج من السرطان
- وممكن احكيلكم عن مكالماتنا أنا وياسمين ورسايلنا كل يوم وزياراتنا كل اسبوع

- وممكن احكيلكم أنا ليه اتجوزت بعد الانفصال ب ١٣ شهر وعملت فرح بالرغم ان مراتي ماكانش فارق معاها نعمل فرح.. وياسمين كانت على علم وزين حضرت الفرح بدون اي مشاكل او نفسيات.. مراتي اللي انتوا نازلين فيها تجريح وتقطيع بدون ذنب.. زي ما نزلتوا تجريح في ياسمين بدون ذنب لما طلعت معايا في مهرجان الجونة وسخرتوا منها عشان ماكانش عاجبكم شكلها واتريقتوا عليها ودمرتولها نفسيتها لمجرد انها مش شبه امها.. لدرجة انها حلفت ما تطلعش في مهرجانات تاني من ساعتها.. ولا نسيتوا؟ كومنتاتكم وجرحكم ليها وسخريتكم منها وألفاظكم النبيلة لسة موجودة على الفيسبوك على فكرة.

- وممكن أحكيلكم مين اللي ضحك على ياسمين ووالدتها وأقنعهم انها تعمل قسطرة تكميلية في المستشفى بتاعتها.. بدل الجراحة التكميلية اللي الدكتور الإسباني رفض يعملها عشان مايحصلش مضاعفات واحتمال وفاة.. وحذرها من القسطرة وأنا وزين حذرناها وللأسف عملتها من ورا ضهرنا.

- وممكن احكيلكم على كل حاجة كل اللي نفسكم تعرفوه..

واضاف: بس بشرط.. كل واحد فيكم يحكيلنا الاول عن اسرار بيته والخبايا اللي ماحدش ينفع يعرفها وعلاقتكم كأسرة وعلاقتكم كأزواج ومين عمل ايه بالتفصيل ومين راح فين وعلاقتكم الصحية ومشاكلكم النفسية وأسماء الدكاترة اللي بيعالجوكم والأدوية اللي بتاخدوها ومين طلق مين وليه ومين اتجوز مين وليه وامتى

اللي مستعد يحكي اسرار بيته بالتفصيل على الملاء أنا هحكيله اسرار بيوتنا بالتفصيل..

وأردف، يا إما خليكم في حالكم وسيبوا الناس في حالها..احنا لا علينا دين لحد ولا مطالبين نحكي اسرارنا لحد

ومن يوم طلاقنا وانا تحولت من زوج ياسمين لأخوها الثالث مش طليقها.. وتحولت ياسمين من زوجتي لأختي التانية مش طليقتي... وغلاوتها في قلبي هتفضل زي غلاوة ندى اختي لآخر يوم في عمري!

خيال علمي بالنسبة لكم؟ معلهش ..احنا كنا اسرة خيال علمي

ادعوا لياسمين بالرحمة والمغفرة وادعوا لبنتها ولأهلها بالصبر والقوة.. وياريت كفاية ترندات وقرف وسيبونا في حالنا بجد

ملحوظة: الصورة ديه من يوم حفل تخرج زين من المدرسة . ٢٨ يونيه ٢٠٢٥ يعني بعد الطلاق ب ستة اشهر