فوضى واشتباكات في لجان الفرنساوي والإحصاء بمدارس 6 أكتوبر الدولية
شهدت عدد من لجان امتحانات اللغة الفرنسية والإحصاء اليوم بمدارس 6 أكتوبر الدولية حالة من الاستهتار وعدم الانضباط، تخللتها مشاجرات وتأخير متعمد من الطلاب ومحاولات دخول بالقوة.
مراقبون: الطلبة بتيجي متأخر وعايزة تدخل بالعافية
قال محمود سيد، مراقب أول بلجنة في مدرسة دولية بالحي المتميز: نسبة كبيرة من الطلبة وصلت بعد بداية الامتحان بنص ساعة، ولما منعنا
دخولهم حصلت مشادات واشتباكات لفظية. في طلاب حاولوا يدخلوا بالقوة وقالوا: كده كده هننجح
وأضافت داليا رفعت مشرفة دور: الزي المخالف كان أزمة النهاردة. بنات جاية بلبس غير لائق تمامًا، وشباب بشورت وكاب. لما بنتكلم بيتقال لنا ملناش دعوة
طلاب وأولياء أمور: اعتداءات داخل حرم المدرسة
أكد الطالب يوسف احمد أن مشاجرة وقعت أمام بوابة إحدى المدارس بعدما منع الأمن دخول مجموعة طلاب متأخرين: "الموضوع اتطور لزق وتطاول، وواحد من الطلبة اتهجم على ولي أمر كان بيحاول يهدي الموقف".
وفي واقعة أخرى، ذكرت هبة كمال ولية أمر: ابني مدرس إشراف، واتعرض لاعتداء لفظي من طالب في سنة تانية عشان قاله اقلع السماعة. الولد قاله: انت مش هتعلمني الأدب، ومحدش له حكم عليا هنا
لامبالاة في امتحان الفرنساوي والإحصاء
قال كريم فتحي"طالب بالصف الثاني الثانوي: "محدش مهتم بالفرنساوي والإحصاء أصلاً. نص اللجنة كانت سايبة الورق فاضي ونايمة على الديسك، والمشرفين سايبينا عشان يخلصوا
وأضافت مريم.شاهين في مواد الهوية السنة اللي فاتت نجحنا والورق أبيض، فطبيعي محدش ياخد المواد دي جد".
الوزارة رصدت مخالفات سابقة
الوقائع دي بتيجي بعد ما وزارة التربية والتعليم أعلنت سابقًا عن رصد مخالفات في 12 مدرسة دولية، حيث تبين أن أوراق إجابة الطلاب كانت خالية من الإجابات رغم حصولهم على درجات مرتفعة. وأكد المتحدث باسم الوزارة شادي زلطة أن الوزارة أحالت الوقائع للشؤون القانونية.