كنزي صديقة هدير فتاة عربة الشاي.. كنا بناخد 300 جنيه في 12 ساعة
كشفت كنزي صديقة هدير فتاة عربة الشاي المصابة في حادث حدائق الأهرام،اليوم السبت، تفاصيل ما جرى في الحادث، حيث أوضحت في تصريحات تليفزيونية، إحنا بنتين بنشتغل على أكل عيشنا وأهلنا ملهمش غيرنا، وهدير بتنزل كل يوم عشان تساعد أهلها في المصاريف.
تفاصيل الحادث
وأكملت كنزي: العربية كانت ماشية بسرعة عاليا جدًا وخبطتنا إحنا الاتنين، ومن سرعة العربية الاكصدامين لزقوا في بعض وهدير في النص، لدرجة إن جلد جسم هدير كان في قلب العربية، أنا وهدير كنا مع بعض وفي كل لحظة وكانت بتكلمني عن خطيبها ونفسها ترجعله.
واختتمت: كنا بناخد 300 جنيه في 12 ساعة وإحنا شغالين على عربية مش بتاعتنا، وأنا أم لأربع أولاد واتصابت في الحادثة ولو مت كانوا عيالي اتشردوا، بقول لأهل الولد والبنت راعوا ربنا في ولاد الناس اللي بتاكل عيش.
وفي نفس السياق، كشف التقرير الطبي لهدير والتي لقيت مصرعها إثر تعرضها لحادث، تفاصيل الحالة الصحية للمجني عليها قبل وفاتها.
التقريرالطبي
وحضرت المجني عليها بائعة الشاي جثة هامدة، وبالكشف تبين عدم وجود علامات حيوية، ووجود جرح قطعي بجوار العين اليمنى بطول 3 سم وجرح قطعي أسفل الأنف بطول 8 سم.
وأشار التقرير الطبي إلى وجود اشتباه بكسر في الذراع اليمنى واشتباه بنزيف في المخ والصدر والبطن والحوض، ووجود بتر في الساقين اليمنى واليسرى، وعدم وجود ضغط أو تنفس، واتساع حدقتي العين ولا تستجيب للضوء.
وعلى الفور تم التأكيد الوفاة، وإيداع الجثمان داخل ثلاجة حفظ الموتى، قبل أن تصرح الجهات المختصة بدفنها.