جمال الشاعر يحتفي بالعيد في ديوان يجمع بين الحنين والبهجة
هنأ الإعلامي الكبير جمال الشاعر، الشعب المصري بعيد الأضحى المبارك، مستعيدًا أجواء البهجة القديمة التي كانت تملأ البيوت دفئًا ولمّةً وفرحًا، حيث كانت تفاصيل العيد البسيطة تصنع بهجة لا تُنسى وتبقى محفورة في الذاكرة رغم مرور الزمن.
وقام بكتابة ديوان شعري يتناول ملامح العيد وذكرياته الشعبية، وما يحمله من طقوس إنسانية دافئة تعكس روح البهجة والحنين إلى تفاصيل الزمن الجميل.
وإليكم نص الديوان الشعري حول العيد الأضحى:
والجزمة اللميع
والبدلة الظباتى
فساتين اخواتى
والنقدية الفابريكة
وأغانى التليفزيون
والكاميرا الكوداك والتصاوير
وعيون الماما الهلكانة والفرحانة
على حس الزيطة السهرانة
من ليلة إمبارح
يانهار فارح
خدوا منى الباقى
من عمرى وإدونى
الأفراح المسروقة
وحطوا شوية بلى ف جيبى
وهاتوا إصحابى
تصفر تحت البلكونة
وجيرانا يهننونا م الشبابيك
وكأن الدنيا بتقولك شبيك لبيك
قرايبنا اللى ف مصر
حييجوا أدان العصر
معاهم تومبيل باشواتى
وإخواتى ح تجرى عليهم بالأحضان
علطول اللمة ف بيت جدى
.. وستى بتغرف
م البسكوت والكحك وماشاالله الملبن
بالفستق والبندق وتعكمنا بالمعلوم
دكاكينى منبصش عيب “المضيوع”
كان كام
.. والأحلام حسابة بتحسب
وتعد عيديات إعمامى وإخوالى وسلسالى
كلاتهم ممكن توصل بيهم حصالة العيد
للخمسة جنيه وتزيد
طب هاتهم أحوشهملك.. هأأو
ياه أنا كنت الواد الجن
بريمو وملك التنشين
تشهدلى ترابيزة البومب
وطخ طرخ
أدوس ف زناد الدهشة
وأرجع كسبان بلالين منفوخة
وكراملة ملو كيسين
والله وبعودة الأيام
تعرف إيه منصوب ف خيالى
لحد الآن
الشادر وتياترو الحلو
وصوت البلياتشو
نصحاله من النجمة
ونزربح نتنطط
والشهقة
ف نطة فتيات الإستعراض بتزأطط
وجنون موتوسيكل “بيرلو” الطليانى
بيطلع روحنا معاه ع الحيط
ويلفلف رايح جاى
ياه ياأماى
مش كنتى تقولى إن العيد طعمه بيتغير
لما بنكبر
وكأنه متفصل على قد البناتيت والصبيان
مش كنتى تقولى كمان
إنه بيعجز ويانا على مر الأيام؟
على كلن كانت دنيانا جميلة
وكانت لمتنا ف وسط العيلة
فسحة وتفاريح وكأننا رحنا الجنة
معهلش أستأذنكم ف الرد على الرنة
واحد صاحبى
على التليفون المحمول
آلو سلامات
وياأهلا بالأعياد ..
.. مش معقول
.. بنتك منة
.. مبروك
.. مبرووووك
طبعا
وياكم من ليلة الحنة
