إسلام رشدي يكشف كواليس انضمامه للأحمر وأسباب رفض عرض الزمالك
كشف إسلام رشدي، لاعب النادي الأهلي السابق، عن كواليس انضمامه للأحمر في الانتقالات الشتوية عام 2014، وأسباب تفضيل الأحمر على الزمالك.
تصريحات إسلام رشدي
وقال إسلام رشدي، عبر بودكاست "جول كاست": «قبل ما أروح الأهلي المستشار مرتضى منصور كلمني وقالي إحنا عايزينك في الزمالك، قولتله خلاص معنديش مشكلة، قفلت وكلمت الكابتن علاء عبد الصادق في الأهلي وحكيتله، فكلمني قالي طب تعالى بقى، عملنا كشف طبي تاني يوم عادي، وبعدها قالي عادي خلاص كدة الدنيا تمام، وقالي أنت هتاخد فلوس كذا كذا، قلت له تمام ماشي».
كواليس مفاوضات الأهلي مع إسلام رشدي
وأضاف: «قالي طب يا ابني أنت ملكش طلبات؟ قولتله لا لا تمام، أنا مرضي، بالنسبة لي أي حاجة أنا مرضي بيها، أصل هكدب؟ بالنسبة لي أي حاجة أنا مرضي بيها، أنا راجل كان عقدي 100 ألف، لما يتحطلي رقم زي ده لا أنا الحمد لله أنا راضي بأي حاجة، مفيش مشكلة، المهم إن أنا ألعب بس».
تدخل الزمالك في اللحظات الأخيرة ولكن !
وتابع إسلام رشدي: «بعدها بقى الدنيا اتشقلبت تاني، وناس من الزمالك لقيتهم جايين لي الفندق بفلوس كتير أوي، كان رقم كبير مكنتش أحلم أمسكه بصراحة، لقيت لعيبة زمايلي قالتلي يا ابني إمضي أنت عمرك ما مسكت فلوس زي دي، قلتلهم لا خلاص أنا مش همضي».
تقدير النادي الأهلي لإسلام رشدي
وختم: «كان مقدم قد عقدي كله في الأهلي، قلتلهم لا مش همضي أنا إديت كلمة للناس وخلاص، جيت تاني كلمت الكابتن علاء عبد الصادق وقلتله اللي حصل، قالي تمام ماشي يا إسلام تعالى لي بقى، لقيته حجزلي فندق قعدت فيه، وبعد كدة اتفاجئت إن هو زودلي عقدي، وقالي أنا مش هنسى حد شاري النادي».
حقق فريق الأهلي فوزاً مستحقاً أمام نظيره المقاولون العرب، بثلاثة أهداف مقابل هدف، في المباراة التي أقيمت بينهما ضمن منافسات الجولة الحادية والعشرون من بطولة الدوري الممتاز 2025-2026.
أهداف الأهلي
سجل أهداف الأهلي كل من تريزيجيه وإمام عاشور وحسين الشحات، حيث جاء هدف واحد في الشوط الأول وهدفين في الشوط الثاني، فيما سجل محمد سالم هدف المقاولون العرب الوحيد.
بهذا الفوز، رفع الأهلي رصيده إلى 40 نقطة من 19 مباراة، محتفظًا بالمركز الثالث في جدول الدوري الممتاز، بينما تجمد رصيد المقاولون العرب عند 18 نقطة من 20 مباراة، محتلاً المركز السابع عشر.