أيتن عامر: شيماء بنت مسترجلة.. وغيرة الست حق مشروع|حوار
في موسم دراما رمضان، لفتت أيتن عامر الأنظار بشخصية “شيماء”، الفتاة القوية التي نشأت في بيئة صعبة وعاشت صراعًا بين طبيعتها الأنثوية والصورة التي فرضها عليها المجتمع.
في هذا الحوار تكشف أيتن كواليس الشخصية، وتفاصيل علاقتها بمودي، وكيمياء العمل مع ياسر جلال، ورأيها في ردود الفعل الجماهيرية.
في البداية.. ما الذي جذبك لشخصية شيماء؟
شيماء كانت جديدة عليّ تمامًا، أول مرة أقدم شخصية بنت “مسترجلة” اتربت من وهي صغيرة على إنها راجل مش بنت، بتشتغل في مدبح وعايشة حياة صعبة، وده خلاني أتحمس للتجربة لأنها بعيدة عني ومحتاجة مجهود وتحضير مختلف.
كيف تتطور الأحداث بعد دخول مودي حياتها؟
فجأة يدخل حياتها رجل بيزنس غني جدًا ويتقدم لها، في البداية بترفض لأنها شايفة إن عالمه مختلف عنها، لكن واحدة واحدة بيقرب لها من مداخل معينة ويقنعها، ومع تطور الأحداث نكتشف إنه من البداية عنده دوافع مادية وبيحاول يستغلها، وده اللي بيخلق صراع كبير بينهم.
غيرة شيماء على مودي.. هل كانت تعرف ماضيه؟
طبعًا كانت عارفة، هي شايفة صوره على السوشيال ميديا وعارفة طبيعة المجتمع اللي عايش فيه، حتى واجهته وقالت له: “سيبت كل البنات دي وجاي تختارني انا؟” كانت متشككة في الأول وده كان سبب ترددها في الموافقة.
هل سنرى تحولًا في شخصية شيماء خلال الحلقات المقبلة؟
مش هقدر أجاوب عشان ما أحرقش الأحداث، لكن الجمهور هيشوف تطورات مهمة جدًا، وفي مفاجآت مستنياهم.
المسلسل فيه لايت كوميدي واضح.. كيف كان التعاون مع ياسر جلال؟
ياسر من السنة اللي فاتت قرر يغير جلده ويميل لأعمال أخف، وده بدأ مع "جودر"، هو في الأساس عمل لايت كوميدي قبل كده، لكن الفترة الأخيرة كان مركز في أدوار جادة، بصراحة اتبسطت جدًا بالشغل معاه، وفي كيمياء واضحة بينا والجمهور لمس ده، وده شيء أسعدني جدًا.
كيف كانت ردود الفعل على المسلسل؟
الحمد لله مبسوطة جدًا، من أكتر الحاجات اللي فرحتني إن الناس بقت تناديني في الشارع باسم الشخصية، يقولوا لي "يا شوقي"، وده نجاح كبير بالنسبة لي ووسام على صدري.
هل هذا عملك الوحيد في رمضان؟
أيوة، هو العمل الوحيد، كنت حابة أركز فيه جدًا، مع إن لو جالي عمل تاني مناسب ومختلف مكنش هيبقى عندي مانع أشارك في عملين.
هل أصبحتِ تضعين شروطًا معينة في اختياراتك؟
أكيد بحاول ألون في أدواري وأقدم حاجة جديدة للناس، شرطي الأساسي إن المسلسل يكون حلو والدور نفسه يكون مكتوب بشكل قوي ويضيف لي.
كلمة أخيرة للجمهور؟
أتمنى المسلسل يعجبهم للنهاية، ويستمتعوا بتفاصيله وتطور الشخصيات، لأن الجاي فيه مفاجآت كتير.