مافيش معلش دي حقوق ناس.. رد ناري من وزير السياحة على واقعة إعلان المتحف المصري الكبير

علق شريف فتحي، وزير السياحة والآثار، على واقعة الشاب عبدالرحمن خالد؛ صاحب فيديو الإعلان الترويجي للمتحف المصري الكبير.

وقال فتحي، في مداخلة هاتفية عبر  قناة «صدى البلد»: «أنا مش شايف أي إبداع في الفيديو الترويجي للمتحف المصري الكبير، الذي أعده عبدالرحمن خالد، الموضوع مش قص ولزق».

الأمر يمثل سرقة وتعدي على الملكية الفكرية 

وأضاف: «الأمور لا تسير بهذا الشكل، والمحترفين هيقولوا إن هذا الشاب بالغ عاقل وسرق الملكية الفكرية لفيديو خاص بالمتحف، وتعدى على الملكية الفكرية والحرية الشخصية لشخصيات عالمية، وأنا من طلبت اتخاذ الإجراءات القانونية ضد صاحب فيديو المتحف الكبير».

وأكمل وزير السياحة والآثار: «الناس اللي هتشتغل بالمشاعر؛ هتقول إن شاب وطني عمل فيلم ترويجي للمتحف المصري الكبير.. ما فعله الشاب تصرف غير محترم، الموضوع مفيهوش معلش، دى حقوق ناس ومش لعب عيال صغيرة».

التخلص من ثقافة معلش

وتابع: «لما أنت تكون في وزارة أو شركة كبيرة، أمامك حل من اتنين، إنك تسكت، أو تكون شريك متضامن مع هذا الأمر… أنا مش ضد هذا الشخص ولا غيره، وأتمنى أن يكون من المبدعين، لو عاوز تعمل حاجة ادخل من الباب بشكل مؤسسي، لم أتواصل مع الشاب، ومش هنطبطب عليه، ولازم نتخلص من ثقافة معلش».