أحمد رمزي
في حواره لـ"إيجبتك".. أحمد رمزي يكشف تفاصيل وكواليس تصوير «فخر الدلتا»
يخوض الفنان الشاب أحمد رمزي تجربة درامية جديدة من خلال مسلسل «فخر الدلتا» المقرر عرضه في السباق الرمضاني 2026، حيث يجسد رحلة صعود شاب بسيط قادم من الأقاليم يحمل حلمًا كبيرًا ويسعى لتحقيقه في القاهرة، وسط تحديات قاسية وصراعات لا تخلو من الأمل والإصرار.
وفي هذا الحوار يتحدث أحمد رمزي عن تفاصيل الشخصية وكواليس التصوير التي وصفها بأنها مليئة بالطاقة الإيجابية.
في البداية.. احكلنا عن مسلسل "فخر الدلتا" وفكرته الرئيسية؟
المسلسل بيتكلم عن رحلة صعود شاب من الأقاليم بيجي القاهرة ومعاه حلم كبير وبيصطدم بواقع صعب وتحديات كتير.
القصة إنسانية جدًا، فيها كفاح وطموح وصراعات، لكن كمان فيها أمل كبير، الفكرة قريبة من ناس كتير شافت نفسها في الرحلة دي.
ما الذي جذبك للدور؟
شدّني جدًا إن الشخصية حقيقية ومش مثالية شاب بسيط، عنده طموح، بيغلط وبيتعلّم، وبيحاول يثبت نفسه من غير ما ينسى أصله، حسيت إن الدور ده ممكن يلمس ناس كتير خصوصًا الشباب اللي بيحلموا يغيروا حياتهم.
هل هناك تشابه بين شخصيتك في مسلسل فخر الدلتا والشخصية الحقيقية ؟
طبعًا في نقاط شبه، خصوصًا فكرة الإصرار، أي حد في المجال الفني بيبدأ من تحت وبيحلم يوصل، يمكن مش نفس الظروف، لكن إحساس السعي والتعب واحد.
العمل هيتعرض في رمضان 2026.. هل ده بيزود عليك الضغط ؟
أكيد رمضان موسم مهم جدًا، والمنافسة فيه قوية، بس أنا شايفها فرصة كبيرة، إن شاء الله ربنا يكتبلنا النجاح الكبير والخير في المسلسل، والناس كلها تتبسط بيه، ده أهم حاجة عندي.
كيف كانت كواليس التصوير ؟
بصراحة الكواليس كلها جميلة جدًا، الروح حلوة بين فريق العمل، وكل الناس بتشتغل بحب، وده بيبان على الشاشة، لما الأجواء تبقى إيجابية، النتيجة بتطلع أحسن بكتير.
هل تم التصوير بين القاهرة والأقاليم؟
آه، صورنا جزء في إحدى محافظات الدلتا علشان نحافظ على مصداقية البيئة، وجزء كبير في القاهرة لأن الأحداث تنتقل مع رحلة البطل، التنوع ده أضاف شكل بصري مختلف.
ما أصعب مشهد صورتُه حتى الآن؟
في مشاهد مواجهة وصدام نفسي كانت مرهقة جدًا، الشخصية بتمر بلحظات انكسار، وكان لازم أعيش الحالة بصدق، المشاهد دي بتفضل معايا بعد ما أخلص تصوير.
هل هناك رسالة معينة حابب توصلها من خلال العمل؟
الرسالة إن مفيش حاجة بتيجي بسهولة، وإن النجاح مش صدفة، لازم تعب وصبر وتنازلات أحيانًا، لكن الأهم إنك تفضل متمسك بمبادئك.
كيف استعديت للشخصية؟
قعدت أتكلم مع شباب فعلاً جايين من الأقاليم وبدأوا حياتهم في القاهرة، سمعت حكايات كتير عن الغربة جوه نفس البلد، وعن صعوبة البداية ده ساعدني أكون قريب من الروح الحقيقية للشخصية.
هل متوقع إن المسلسل ممكن يحقق صدى كبير ؟
بذن الله إحنا تعبنا جدًا فيه، وكل واحد في الفريق حاطط قلبه قبل مجهوده، وأتمنى الجمهور يشوف ده ويحس بيه.
كلمة أخيرة لجمهورك قبل عرض المسلسل؟
استنوا "فخر الدلتا" في رمضان 2026، وإن شاء الله تلاقوا فيه قصة قريبة منكم وتعيشوا الرحلة معانا لحظة بلحظة، دعمكم هو الدافع الحقيقي لينا دايمًا.