رمضان صبحي في قضية «التزوير»: فصلوني .. وكنت بدفع 30 ألف في الترم
يواصل "ايجبتك" نشر نص تحقيقات النيابة العامة في القضية رقم 6407 لسنة 2025 جنايات مركز الجيزة والمقيدة برقم 548 لسنة 2025 كلي جنوب الجيزة، المتهم فيها لاعب بيراميدز ومنتخب مصر "رمضان صبحي" ومشرف أمن بمعهد فني وعامل بمقهي وآخر، في واقعة تزوير أوراق حكومية تخص اللاعب لأداء امتحانات بمعهد بأبو النمرس.
وجاءت أقوال لاعب بيراميدز ومنتخب مصر في تحقيقات القضية التي أحليت مؤخرا إلى محكمة الجنايات المختصة لإدانه المتهمين جميعًا في واقعة التزوير. كالتالي:
س: هل اخبرك المتهم طارق المصرى بالتحاقك بمعهد الفراعنة العالي للسياحة والفنادق وقيدك فيه؟
ج: هو كان بيتواصل معايا كل ترم ويطلب فلوس لكن مكنش بيقولى أنا في سنة كام أو في الترم الكام.
س: وهل تحصل منك سالف الذكر على ثمة مبالغ مالية؟
ج أيوة .
س وما هو مقدار تلك الأموال تقريبًا ؟
ج: هو كان بياخد منى ٣٠ أو ٤٠ الف جنيه كل ترم ودة من بداية عام ۲۰۱۹ او ۲۰۲۰ مش متذكر بالظبط
س: وما هي طريقة تسليمك لسالف الذكر تلك المبالغ المالية؟
ج: هو في الأول كان بياخد كاش و بعدين بقيت بحوله على برنامج انستا باى.
س: وهل من ثمة إيصالات دفع أو إيصالات تحويل تحصلت عليها من سالف الذكر مقابل تلك المبالغ ؟
ج: من على تليفوني .
س و من اي هاتف جوال كنت تقوم بأرسال تلك المبالغ له؟
ج: لا أنا بس كنت باخد منه اثباتات القيد فقط لا غير وحتى التحويلات كانت الأخيرة على انستا باي.
س: وأين ذلك الهاتف المحمول خاصتك ؟
ج هو مع شريف اكرامى اخو مراتى علشان لما وقفوني في المطار أخد متعلقاتي خلاها معاه .
س: وما الذي حال دون وقوفك على حالتك وموقفك الدراسي في المعهد محل الواقعة؟
ج: أنا مسالتش لأني كان كل اللى يهمنى اثباتات القيد علشان أسافر واني أكون مقيد بمعهد ومبقاش أخر مؤهل بالنسبة لي الثانوية العامة علشان تقديم اولادى بالمدارس والمظهر الاجتماعي.
س: ما هي ظروف ضبطك واحضارك وعرضك علينا ؟
ج اللي حصل اني كنت في معسكر تدريب في تركيا وبعدين أول ما وصلت المطار قبضو عليا وجابوني انهاردة على النيابة وده اللي حصل .
س متى وأين حدث ذلك؟
ج الكلام دة حصل انهاردة ٢٠٢٥/٧/٢٩ الساعة ٢ الفجر تقريبا في مطار القاهرة
س ومن كان برفقتك آنذاك؟
ج: كان معايا شريف إكرامي اخو زوجتى وراجعين مع بعض من تركيا.
س: وما سبب ومناسبة تواجدك بالزمان والمكان سالفي الذكر ؟
ج: أنا كنت راجع من معسكر تدريب في تركيا ووصلت مطار القاهرة.
س: وإلى أين تم اقتيادك تحديدًا ؟
ج: هما اخدوني من المطار وقالولي إن فيه تشابه أسماء وبعدين جالى واحد ظابط وقاللي اتفضل معانا وقعدت في اوضة لحد ما قوة جت واخدتني على مركز شرطة أبو النمرس.
س: وما هي وسيلة انتقالك إلى ديوان المركز تحديدًا؟
ج هما أخدوني في ميكروباص وبعد كدة ركبوني في بوكس شرطة.
س: وهل تقف على شخص قائدها وأرقام وبيانات لوحاتها تحديدا؟
ج: لا ماخدتش بالي .
س وما الاجراء الذى تم اتخاذه حيالك بديوان مركز شرطة أبو النمرس ؟
ج: أنا فضلت هناك مقعدني لحد ما جيت على النيابة.
س وما علاقتك بالمدعو محمد إبراهيم عبد الواحد الشهير " بالعمدة "؟
ج انا معرفوش ولا رحت المعهد مرة واحدة حتى ولا أعرف المعهد نفسه فين .
س و هل دار فيما بينك وبين المتهم طارق المصرى ثمة حوار أول ابراهيم اى اتفاق بشأن تحصلك على الشهادة الخاصة بالمعهد سالف البيان؟
ج هو أنا مش مهتم أساسا بالشهادة وكان كل اهتمامي اني اخد اثبات القيد علشان اعرف اسافر والمظهر اني مقيد في المعهد من ثانوية عامة وفي نفس الوقت هو كان بياخد مبلغ قليل حوالي ٣٠ او ٤٠ الف جنيه في الترم ومكنتش بسأله كثير ولا قليل وكان كل اللى بيهمني يجيب اثبات القيد ومسألتوش أنا في سنة كام لأنى كل اللى فاكره انه بياجللي فمكنتش بسأله على اى حاجة لأن مصلحتي ودنيتي ماشية في إثبات القيد وبسافر براحتي ومقيد بمعهد عالى.
س: وهل قمت بالاطلاع على أي إثبات قيد والسابق صدورها من المعهد محل الواقعة ومراجعة بياناته؟
ج لا أنا مكنتش براجع حاجة لأنه كان في الأغلب الإداريين بتوع النادى هما اللي بيستلموه ويخلصو معاه و الإدارة العامة للتجنيد علشان يجيبو تصاريح السفر وعلشان كدة مادام مصلحتى ماشية مكنتش ساله.
س: وما الذي حوته تلك الاثباتات وما مضمونها؟
ج: كان مضمونها اني مقيد في المعهد.
س: كم عدد اثباتات القيد التي قمت باستخراجها تحديدًا؟
ج هو عدد كثير من بداية ۲۰۱۹ او ۲۰۲۰ ولكن انا مش متذكر العدد بالظبط وانا برضو بقالي سنتين
ج: ماخدتش اثباتات قيد لأنى اخدت شهادة إعفاء نهائي من التجنيد
س: ومتى كان تاريخ أخر إثبات قيد تحديدًا ؟
ج أنا مش فاكر بالظبط كان آخر اثبات قيد امتى بس ممكن يكون ساعة ما كنت بجدد البطاقة بتاعتى وبنقل من أرض اللواء إلى بالم هيلز.
س : وأين تحديدًا ً قمت باستخراج البطاقة والسجل المدني الخاص باستخراجها؟
ج: سجل مدنى العباسية.
س: متى تحديدًا ً كان استخراج آخر قيد وفيما كان استخدامه؟
ج أنا مش فاكر بالظبط بس ممكن يكون ساعة البطاقة ومش فاكر جبته ولا لا.
س: ومتى تحديدًا صدرت لك الاعفاء النهائي سالف البيان؟
ج: من حوالي سنة ونص أو سنتين.
س: وهل تم تقديم تلك الاثباتات إلى إدارة التجنيد؟
ج ايوة طبعا الاثباتات دى راحت إدارة التجنيد علشان اطلع بيها تصاريح السفر و أسافر ولكن بعد ما طلعت الإعفاء أنا مكنتش محتاج أى اثباتات للتجنيد ثاني .
س: ومتى تحديدًا أخر تاريخ قمت فيه بتحويل ثمة مبالغ مالية للمتهم طارق محمد محمد صالح ؟
ج أنا آخر حاجة كانت في بدايات عام 2025.
س وهل كانت بحوزتك شهادة الاعفاء النهائية؟
ج ايوة .
س: وما الباعث والدافع تحديدا من استمرارك بتحويل مبالغ مالية إلى المتهم طارق المصرى بالرغم من حصولك على شهادة التجنيد والإعفاء النهائية ولا حاجة لك في أي أثباتات قيد؟
ج: أنا كنت بحوله الفلوس على أساس انى أفضل مقيد في المعهد لأن ابنى مقدم في المدرسة فلازم يكون للأب مؤهل دراسي و ابنى الثاني هقدمله فكنت محتاج انى أفضل مقيد في المعهد وأنا كنت فاكر أن طارق بيأجل لى الامتحانات ومعرفش هو كان بيعمل ايه بالظبط وأنا بعد ما ابني الثاني كان هيدخل المدرسة وهو باقيله سنتين ويدخل كي جي وأول ما يدخل خلاص أنا كنت سحب الملف و الورق بتاعي من هناك.
س؛ وهل اطلعت على أى إثبات قيد من التي قدمها لك المتهم طارق المصري و هل ابصرت بها أي بيانات ووقفت فيها على موقفك الدراسي تحديدًا؟
ج لا أنا كنت بستلم إثبات القيد وساعات كان اللى بيبستلمهم مندوب النادى أو وكيل المنتخب علشان يخلص تصاريح السفر.
س: وهل كان آخر إثبات قيد استلمته بشخصك أمام مندوب .
ج: أنا ش فاكر أنا استلمتهم ولا لا بس لو أنا استلمته يبقى يشخصي.
س: وما هي المدة التي قضيتها في المعهد العالي العلوم الحاسب ونظم المعلومات بالتجمع ؟
ج: مش فاكر بالظبط بس كل اللى فاكره إني رحت مرة واحدة بس وكان يوم امتحان.
س :وما سبب التحويل من ذلك المعهد الى معهد الفراعنة العالي للسياحة والفنادق محل الواقعة؟
ج: علشان أنا تقريبا اتفصلت ساعتها فمحمد الشناوى عرفني على طارق المصرى وقدم لي طارق ساعتها في معهد الفراعنة.
س وما الذي حال دون فصلك من المعهد سالف البيان؟
ج: أنا عمري ما سألت طارق أنا في سنة كام ولا انفصلت من المعهد لأني كنت بدفع لطارق فلوس وكنت لما احتاج اثبات قيد بيجيبهولي.
س وهل كانت طريقة دفعك للمبالغ المالية للمتهم طارق المصرى على دفعات وسنوية ؟
ج هو أنا كنت بدفع كل ترم لأن طارق كان بيقولى أنه عايز فلوس على بداية كل ترم علشان المعهد وأنا مكنتش بسأله علشان باخد اثباتات القيد براحتي وهو بيعمل اللي أنا عايزه.
س: وما هو إجمالي المبالغ المالية المدفوعة للمتهم طارق محمد محمد صالح؟
ج: أنا كنت بدفع ٣٠ أول ٤٠ الف من أول ما دخلت المعهد وبعدين آخر مرة ٥٠ ألف وفي الأول كنت بدفع كاش ومرة واحدة شيكات وكانت من زمان و بعدين انستا بای
س: وهل قمت بتحويل ثمة مبالغ مالية أخرى للمتهم طارق محمد محمد صالح عقب استصدارك لبطاقة تحقيق الشخصية ؟
ج: ايوة.
س وما سبب اجراءك لذلك التحويل ؟
ج عشان طارق قلي أنه محتاج فلوس للمعهد على الترم الثاني كمصاريف الدراسة.
س: وهل استمرار دفعك لتلك الأموال لا يعني قيدك بالمعهد وتنقلك بين الفرق والسنوات الدراسية؟
ج: أنا اللي كنت بدفع كمصاريف وأنا كنت محتاج إني أبقى مقيد بس مش محتاج إني انجح وكان كل همي اني أفضل مقيد.