الولادة القيصرية.. أحمد مراد: أجهزة مستوصفات «بير السلم» من سوق الجمعة|خاص

في ظل الحديث المتواصل عن ارتفاع عدد حالات الولادات القيصرية في مصر، تظهر اختلافات واضحة بين المستشفيات الراقية والمستوصفات الشعبية، الأوضاع في المستشفيات الصغيرة تطرح أسئلة حول سلامة الأجهزة وأساليب التخدير.

في السطور التالية، نستعرض تفاصيل صادمة حول الواقع الطبي في بعض المناطق الشعبية من خلال رواية الدكتور أحمد  مرزوق مراد، استشاري وزميل أمراض النساء والتوليد، واصفا بعض المستشفيات بـ"مستوصفات بير السلم".

مستوصفات شعبية تحت بير السلم

الدكتور أحمد  مرزوق مراد أشار في تصريحات خاصة لـ"إيجبتك" عن بعض المستشفيات في المناطق الشعبية، إلى الفارق الشاسع بين المستشفيات الهاي كلاس وباقي المستشفيات، قائلا: “بعيدا عن القطاع الحكومي، لأن الحكومة بتشتري الأجهزة كلها جديدة من بره”.

وأضاف، "أنا باتكلم عن مستوصفات ومستشفيات تحت بير السلم بتشتري الأجهزة من سوق الجمعة، فالآلة دي استخدمت في مستشفى وخرجت كهنة، فبيروح يشتريها من السوق، مش باتكلم عن تعقيمها لأنها اتعقمت وزي الفل لكنها في النهاية مش جديدة، لك أن تتخيل اللي ممكن يحصل لما تستخدم آلة جديدة لأول مرة وآلة تانية استخدمت 100 مرة، طبعا ده بيعمل التصاقات بعد كده تجيلك العيانة، عندها مشيمة ملتصقة وكده تبقى أثرت عليها وعلى الجنين لو لا قدر الله حصلها مشاكل زي استئصال الرحم وغيره".

التخدير في الولادات القيصرية

وحدد مصدر الحالات التي يتم فيها استخدام التخدير الكلي في الولادات القيصرية، قائلا: "العالم كله يلجأ للبنج النصفي في القيصرية لأنه أمن وأسهل وأسرع والعيانة بتفوق بسرعة والمثانة والأمعاء بتشتغل بسرعة، الكلمة الصعبة اللي بنستخدمها عندنا للأسف هي كلمة "إبرة الضهر" هو البنج الجزئي بيدخل في جزء من العضلات اللي جنب العمود الفقري في عصب معين يتم حقنه فبيحصل عدم إحساس بالألم".

وأضاف، "فيه فارق كبير بين البنج اللي بيستخدم في المستشفيات الكبيرة أو الحكومة أو في المناطق الشعبية.. مفيش بنج كلي في أي عملية قيصرية إلا في حالات استثنائية جدا، زي حالات القلب المفتوح أو عيانة عندها نزيف أو عندها مشكلة في البيبي ومينفعش تستنى حقنة الضهر، أو مثلا عيانة تكون عندها مثلا حالة جراحة بعد الولادة".

شد البطن مع القيصرية ممنوع

وتابع: “بالمناسبة مفيش حاجة اسمها شد بطن مع القيصرية وده ممنوع تماما، ولا يتم إجراؤه في المستشفيات الحكومية ولا المستشفيات الكبيرة، ده بيحصل فقط في مستشفيات أو مستوصفات تحت السلم وبتحصل معاه مضاعفات لأن طبيا مفيش الكلام ده”.