ياسمين كساب تكشف موقفها من استكمال «السرايا الصفرا» بعد قرار الاعتزال|خاص

أعلنت الفنانة ياسمين كساب اعتزالها الفن، مشيرة إلى أنها اتخذت قرار الاعتزال بشكل مفاجئ بالأمس نتيجة لتراكمات بسبب مواقف كثيرة مرت بها وأصابتها بالإحباط.

وأوضحت ياسمين كساب، في تصريحات خاصة لـ"إيجبتك"، موقفها من استكمال دورها في مسلسل “السرايا الصفرا” مع الفنانة وفاء عامر، وذلك بعد قرار اعتزالها المفاجئ.

وقالت إنها تعاقدت على المشاركة في مسلسل “السرايا الصفرا” قبل قرار الاعتزال وبالتالي هي ملتزمة بعقود مع الشركة المنتجة لا تستطيع الإخلال بها مما يضطرها لاستكمال تصوير دورها والذي يعد بالنسبة لها آخر عمل في مسيرتها الفنية.

رحمة أحمد عن قرار اعتزالها: عايزة أموت خفيفة

جدير بالذكر أن الفنانة رحمة أحمد أعلنت أيضاً قرار اعتزالها بشكل مفاجئ، مشيرة إلى إن السبب وراء ذلك رفضها تقديم تنازلات للحصول على الشهرة التي تستحقها.

ونشرت رحمة أحمد، عبر حسابها الشخصي على موقع التواصل الاجتماعي فيسبوك:"أنا مقولتش اتحجبت زي ما الصفحات بتنزل ،مع أن ده شئ يسعدني و مش معنى أني مش محجبه أني معرفش ربنا ( ربنا عالم بالنوايا و الناس مالهاش إلا الظاهر ) أنا قولت كفايه تمثيل و مش معنى كده أني بقول أنا توبت، توبت دي لما أكون كنت بستخدم مهنة التمثيل في حاجة حرام أو حاجة غلط  والحاجات اللي اشتغلتها وأختارتها أكبر دليل ، لكن بالعكس أنا بحترم الفن جدا جدا و يمكن ده سبب ابتعادي عنه لأني علشان اشتغل و أتواجد و يكون ليا أدوار حلوة مضطرة أدفع تمن  كبير سواء مجاملات او إساءات أو تعدي عليا أو مساومات من بعض المخرجين و المنتجين وأحيانا نجوم علشان أعمل الدور ده لازم أوافق ع حاجة معينه طبعا مش كل الناس كده و دي مهنة زي أي مهنة فيها الكويس والوحش، أنا بحترم الفن جدا و بحترم الفنانين اللي بجد". 

واستطردت رحمة:"معرفتش اتسلق ولا عرفت استغل مشاعر واحد ليا وأطلع عليه ولا عرفت أعشم حد كان ف أيده مساعدة ليا لحد ماخد مصلحتي وأطير ، معرفتش أنا أصلا مش عارفة بقول كل الهري ده ليه بس أنا حاسه اني بموت و مش عايزة أموت و أنا شايلة في قلبي حاجة زي اللي مشيوا في عز شبابهم  عايزة أمشي وأنا خفيفه أنا متشكرة جدا لأي حد ساعدني في الوسط ده حتى لو بتشجيع معنوي ، أو حاول يديني فرصة حتى لو صغيرة ، أو حد قالي أنتي شاطرة  ده اللي كان بيخليني أكمل وكان بيخليني أحس أني موهوبة برغم شكي دايما ف موهبتي". 

واختتمت رحمة منشورها:"مش مسامحة أبدا أي حد أتكلم ف ضهري وأنا أصلا في حالي، ولا حد كان في أيده يساعدني وعارف أني استاهل ، ولا حد جه وساومني على شغل وكان عايز مني خدمة تانية غير أني أكون ممثلة وأي حد وقفلي شغل علشان ممسكتش الطبلة".