بعد «أخدت غرضها مني».. أبو الليف يكشف عن رسالة ثانية من مذيعة أخرى
أكد المطرب نادر أبو الليف، أن هناك إحدى المذيعات تواصلت معه وأعربت عن حزنها الشديد من منشوره الذي هاجم فيه مذيعة أخرى ولكن دون أن يذكر اسمها، لكن ذكر أول حرف منها وهو N، مؤكدًا أن منشوره كان لمذيعة ثانية.
وكتب أبو الليف عبر حسابه الشخصي بموقع فيسبوك: «حصل خير يا جماعة، لبس في موضوع المذيعة مع صديقة وأخت محترمة مذيعة تانية خالص، والموضوع لا يمت بأي صلة لها لا من بعيد ولا من قريب وهذه المذيعة من يوم لما اتعرفنا علي بعض وهي في منزلة أخت وصديقة عزيزة غالية».
وتابع: «ويشهد الله علي كلامي وهذا للعلم بالشيء لأنها تواصلت معي وزعلانة علشان البوست اللي نزلته ووضحت الصورة لها وتحت أمرها لأنها أخت عزيزه بكنلها كل التقدير والاحترام والأخوة وهذا توضيح وتعديل لسؤ الفهم فقط لاغير وشكراً».
أبو الليف يوجه رسالة غامضة لـ مذيعة
وكان أبو الليف كتب عبر حسابه الشخصي بموقع فيسبوك: «مساء الخير علي كل حبايب قلبي اللي متابعين عايز أقول علي مذيعة شغالة علي قناة فضائية أول حرف من اسمها N وساكنة في الرحاب، كنا أصحاب مقربين جدا جدا جدا وبعد لما أخدت غرضها مني عملتلي حظر».
وتابع: «لو مفكتش الحظر هقول علي اسمها والقناة اللي شغالة فيها واسم البرنامج علشان بمزاجي لكن تفتكري إنك مفتحه وأخدتي اللي إنتي عايزاه مني وضحكتي عليا فأهون عليا أقول كل حاجة وأنا راجل مفيش حاجة تعبني».
وأضاف: «أنا منتظر وعامل بأصلي وبالعيش والملح وهنزل كمان صور لينا لو ماشالتش الحظر وهيبقي كل حاجة علي عينك يا تاجر أنا مش بهدد ولكن بعمل اللي عليا قبل لما أخد أي خطوة واللي عايز يعرف مين هيكلمني علي الواتس آب وشكرًا».
وتعرض نادر أبو الليف للهجوم بعد منشوره الذي كتبه عن إحدى المذيعات، ليخرج عن صمته ويرد من خلال منشور آخر كتبه عبر حسابه الرسمي بموقع التواصل الاجتماعي "فيس بوك"، معلقًا: “السلام عليكم ورحمة الله وبركاته.. إلي كل من اتريق وقال عليا أي كلام فاضي ومقدرش ولا فهم مقصود البوست، وعمال يهري ويهبد وبيزايد.. عايز أقولهم عيب”.
واستكمل: “كل واحد يلزم حدوده ويحترم نفسه، علشان المفروض إنكم ناس مثقفة وناس بتفكروبتقدر وبتفهم، واللي بيقول إن أنا بشهر بالمذيعة وعايز يرفع قضية هترفع قضية علي إيه يا ناصح إخواتك، أنا لا قولت أي شئ يدل على هي مين يبقي هترفع قضية علي إيه بلاش هبد، وعيب عليكم لأن أنا لو عايز أقول هي مين كنت قولت وعرفتكم وأي رد فعل منها أنا قابل وموافق”.
تهديدات ووعود من أبو الليف لمهاجميه
ووجه أبو الليف رسالة حاسمة لمنتقديه، قائلًا: “أي حد عايز يرفع قضية علي البوست اللي نزلته أنا جاهز جدًا بس لو خسرتوا القضية أقسم بالله ما هتصعبوا عليا.. ومش هتنازل وهاخد حقي بما يرضي الله ثم بالقانون، علشان كل من تسول له نفسه يعرف قبل ما يخطي أي خطوة ويتقي الله لأن أنا والحمد لله ماشي جوا الحيط ولا ليا في اليمين ولا في الشمال ولا ليا في اللف والحوارات اللي بتقولوا عليها، لأن العمر عدي وفات ولا يبقي منه غير القليل، والحمدلله راضي بكل ما مريت بيه في حياتي وفي دنيتي”.
واختتم نادر أبو الليف منشوره قائلًا: “وأرجوا يكون كلامي اتفهم وأوضحت الصورة وممكن يكون اللي كتبته غير مقصود بالمعني اللي وصل لكم، ولكن أنا غير مسؤول عن تفكيركم وضمائركم، لأن فيه ربنا هو اللي في الآخر هنقف كلنا قصاده وهنتحاسب، وأنا راضي كل الرضي، وأشكركم وآسف علي الإطالة”.