بعد اعتزالها الفن.. رحمة أحمد تتصدر التريند بإعلانها عن مشروع ملابس

تصدر اسم الفنانة رحمة أحمد تريند محركات البحث جوجل ومواقع التواصل الاجتماعي في الأيام الماضية، بعدما أعلنت عن اعتزالها مجال الفن، مشيرة إلى استعدادها لإطلاق مشروع ملابس جديد.

ونشرت صورة لها دون غطاء الشعر، عبر حسابها الرسمي بموقع التواصل الاجتماعي "فيس بوك"، وكتبت، معلقة: "مشروعي الجديد صغير وبسيط.. لو عجبكوا قولولي أكمل فيه ولا لا، ولو حد عنده اقتراحات يقولي".

تفاصيل اعتزال رحمة أحمد مجال الفن

ونشرت رحمة أحمد، عبر حسابها الشخصي على موقع التواصل الاجتماعي"فيس بوك": “أنا مقولتش اتحجبت زي ما الصفحات بتنزل ، مع أن ده شيء يسعدني و مش معنى أني مش محجبه أني معرفش ربنا ( ربنا عالم بالنوايا و الناس مالهاش إلا الظاهر ) أنا قولت كفايه تمثيل و مش معنى كده أني بقول أنا تبت، تبت دي لما أكون كنت بستخدم مهنة التمثيل في حاجة حرام أو حاجة غلط  والحاجات اللي اشتغلتها واختارتها أكبر دليل”.

واستكملت:  "أنا بحترم الفن جدا جدا و يمكن ده سبب ابتعادي عنه لأني علشان اشتغل و أتواجد و يكون ليا أدوار حلوة مضطرة أدفع تمن  كبير سواء مجاملات أو إساءات أو تعدي عليا أو مساومات من بعض المخرجين و المنتجين، وأحيانا نجوم علشان أعمل الدور ده لازم أوافق ع حاجة معينه طبعا مش كل الناس كده و دي مهنة زي أي مهنة فيها الكويس والوحش، أنا بحترم الفن جدا و بحترم الفنانين اللي بجد". 

وأضافت رحمة: "جالي فرص أعمل أدوار أكبر و جتلي كتير بس المقابل كان هياخد حتة من إنسانيتي و صدق مشاعري و اللي عارفني عن قرب عارف أنا بتكلم في إيه و حتى ده دفعت  تمنه غالي من الناس ، اللي يقولي أنتي كومبارس واللي بيقول أنتي مش لاقيه اللي يشغلك  علشان الفرص المحترمة أو خليني اقول الفرص "الفنية “ اللي جتلي في التمثيل كانت صغيرة وكنت بقبل بيها لأنها كلها أعمال محترمه لمخرجين وفنانين محترمين و قبل كل ده عندهم إنسانيه وأصول في الشغلانة”. 

واستكملت رحمة أحمد منشورها: "أنا  حالياً وبقالي فترة كبيرة واقعة في صراع بين أني أكمل وأفضل قوية واستنى الفرصة اللي معتمدة على موهبتي في عمل حقيقي محترم يحترم موهبتي وإنسانيتي أو أدفع تمن ده من حياتي النفسية والضغط المادي اللي بتعرضله لقلة الشغل، وأستحمل كلام من الناس  يوجع و ياكل في نفسيتي برضو وأتحمل إهانه أني بختار أشتغل في أدوار صغيرة وأعمل مجهود كبير فيها واللي فيه ناس بتوقفني في الشارع تكلمني عنها و تكون مبسوطة بيها ومستنيه تسمع هشتغل تاني ف ايه برغم أنها صغيرة جدا ولا أبيع قلبي و أبيع صدق مشاعري و أتحول لكائن تاني معرفوش". 

رحمة أحمد: عاوزة أموت وأنا خفيفة

واستطردت رحمة: "معرفتش اتسلق ولا عرفت أستغل مشاعر واحد ليا وأطلع عليه ولا عرفت أعشم حد كان ف إيده مساعدة ليا لحد ماآخد مصلحتي وأطير ، معرفتش أنا أصلا مش عارفة بقول كل الهري ده ليه بس أنا حاسه اني بموت و مش عايزة أموت و أنا شايلة في قلبي حاجة زي اللي مشيوا في عز شبابهم  عايزة أمشي وأنا خفيفه أنا متشكرة جدا لأي حد ساعدني في الوسط ده حتى لو بتشجيع معنوي ، أو حاول يديني فرصة حتى لو صغيرة ، أو حد قالي أنتي شاطرة  ده اللي كان بيخليني أكمل وكان بيخليني أحس أني موهوبة برغم شكي دايما ف موهبتي". 

واختتمت رحمة منشورها:"مش مسامحة أبدا أي حد أتكلم ف ضهري وأنا أصلا في حالي، ولا حد كان في إيده يساعدني وعارف أني أستاهل ، ولا حد جه وساومني على شغل وكان عايز مني خدمة تانية غير أني أكون ممثلة وأي حد وقفلي شغل علشان ممسكتش الطبلة".