ياسمينا العبد عن ميد تيرم: «أقرب حاجة عملتها لقلبي ومكنتش متخيلة النجاح»
شاركت الفنانة ياسمينا العبد، مجموعة من الصور عقب انتهاء الحلقات الأخيرة من مسلسلها ميد تيرم، الذي عرض عبر منصة شاهد وWatch It، مشيرة إلى أن المسلسل من أقرب الأعمال لقلبها فهو أضاف لها كثيراً في مشوارها.
رسالة ياسمينا العبد بعد عرض المسلسل
وكتبت الفنانة ياسمينا العبد عبر حسابها الشخصي بموقع فيسبوك: «أنا كنت متأخرة في البوست ده لأني حقيقي مش عارفة أعبّر عن مشاعري بعد نهاية المسلسل.. مش عارفة أقول إيه ولا أشكركم إزاي، المسلسل ده أقرب حاجة عملتها لقلبي، أنا بجد مش قادرة أوصف التعب والمجهود اللي اتبذل من أكبر شخص لأصغر شخص، اللي ورا الكاميرا قبل اللي قدام الكاميرا بس الحقيقة إن كل شخص اشتغل في المشروع ده كان جزء أساسي من نجاحه».
وتابعت: « وإحنا بنقرأ وبنحضّر عمرنا ما كنا نتخيل إننا نوصل للتوب 1 على شاهد وWatch It، ولا إننا نوصل لمليار مشاهدة. يعني إيه الرقم ده أصلًا ؟؟؟؟ كنت خايفة جدًا وأنا بشتغل على المشروع ده لأني ما كنتش عارفة هل هكون قد التحدي ولا لأ لولا الأستاذة مريم الباجوري، واحدة من أهم المخرجين دلوقتي، ما كانش هيبقى فيه مسلسل أصلاً… بشكرك على ثقتك فيّ وثقتك في الشباب، وبنشكرك على العظمة اللي أنت فيها».
ياسمينا العبد: شكرًا على شغلكم اللي فوق العظمة إنتوا كسّرتوا الدنيا
وأضافت: «أنا فخورة إني كنت جزء من أول عمل درامي ليكي بحبك جدًا جدًا جدًا كل النجوم اللي كان ليا الشرف إني أشتغل معاهم، شكرًا على شغلكم اللي فوق العظمة إنتوا كسّرتوا الدنيا، عمري ما اشتغلت مع ناس مليانة بالشغف بالشكل ده والكيميا اللي كانت بينا كانت توفيق كبير من ربنا.. انتم عيلة حقيقية بجد بشكر المتحدة على الفرصة دي وعلى ثقتهم فيّ».
وأختتمت ياسمنيا العبد حديثها بقول: «شكرًا للأستاذ أحمد فايق، عبد الله غلوش، وأحمد شفيق على الدعم ويا رب اللي جاي يبقى أكبر وأحلى كمان بشكر وزارة التعليم العالي على الدعم والتركيز العظيم، شكرًا إنكم مؤمنين بطاقة الشباب وبمشاكلنا بشكر الأستاذ محمد صادق وورشة براح على الورق اللي شفنا نفسنا فيه وأهم شكر في الدنيا كلها، إنتم شكرًا ليكم إنتم على كمية الحب اللي أنا لحد النهارده مش قادرة أستوعبها اندمجتوا في القصة بشكل عمري ما شوفته في حياتي، وتقريبًا عمري ما هشوفه المشروع ده ليكم صوتكم مسموع وتحدياتكم متقدّرة اللي بيطلع من القلب بيروح للقلب شكرًا من هنا لبُكرة».
تفاصيل مسلسل ميدتيرم
وتدور أحداث العمل في إطار اجتماعي درامي حول حياة الشباب في فترة الجامعة وخارجها، وما يتعرضون له من صعوبات وتحديات، إلى جانب بعض المشاكل الاجتماعي الذي يواجهونا، كما يركز العمل على الضغوط الاجتماعية والنفسية التي يواجهها الطلاب وعلاقاتهم بأهاليهم.
ومسلسل ميد تيرم من بطولة ياسمينا العبد، جلا هشام، يوسف رأفت، زياد ظاظا، أمنية باهي، دنيا وائل، وغيرهم من الفنانين، ومن تأليف محمد صادق، وإخراج مريم الباجوري.