«اللي يذم في تمثيل غيره فاشل».. رسالة نارية من مراد مكرم

انتقد الفنان مراد مكرم تصرفات بعض الفنانين والتي يعلق فيها بالسلب على زملائه في الوسط الفني من خلال موقف مؤثر بينه وبين والده الراحل.

ونشر مراد مكرم، عبر حسابه الشخصي على موقع التواصل الاجتماعي فيسبوك:"أبويا، الله يرحمه، كان عنده محل موبيليا، كان لما يدخل له زبون يقوله، ده فلان عنده سفرة زي دي، مثلاً، بكذا..أرخص يعني.. كان يقوله برافو عليه، هو يمكن أشطر مني أنه عرف يعملها أرخص...، رغم أني كنت عارف أن شغل الخشب بالذات فيه لعب كتير، من نوع الخشب المستخدم، لنوع التشطيب، للنجار اللي بيشتغل".

انتقاد مراد مكرم لذم الفنانين لزملائهم في الوسط الفني

وأضاف مراد مكرم:"المهم...سألته مرة ،أنت عارف أن فلان ده بيشتغل بخشب كذا مش كذا و علشان كده أرخص.. قالي جملة طبقتها على كل حياتي ...التاجر الفاشل هو اللي يذم في بضاعة غيره....اعرف أزاي تبيع بضاعتك من غير ما تقلل من بضاعة حد.طبق بقى الحكمة دي عزيزي المتابع على كل حياتك".
واختتم مراد مكرم منشوره، قائلاً":اللي يذم في صوت غيره مغني فاشل.. اللي يذم في تمثيل غيره ممثل فاشل.. اللي يذم في تشطيبات غيره مقاول فاشل
و هكذا.. خليك في بضاعتك ومالكش دعوة بغيرك".

إنتهاء تعاقد مراد مكرم مع قنوات CBC

جدير بالذكر أن الفنان مراد مكرم أعلن عن انتهاء تعاقده مع شبكة قنوات cbc، وذلك عبر حسابه الشخصي على موقع التواصل الاجتماعي فيسبوك.

ونشر مراد مكرم، عبر حسابه الشخصي على موقع التواصل الاجتماعي فيسبوك:"بعد سنوات من العمل أعلن اليوم عن انتهاء تعاقدي مع شبكة قنوات CBC.. الخبر ده مش سهل يتكتب في سطرين لأن CBC مكانتش مجرد شاشة بطلع منها دي كانت بيتي التاني"

وأضاف مراد مكرم:"من أول يوم دخلت فيه المكان وأنا حاسس إني وسط عيلة حقيقية بتشتغل بحب باحترام وبإيمان إن اللي بنقدمه للناس لازم يكون نابع من ضمير حقيقي ومسئولية.. بحب أشكر كل حد اشتغلت معاه قدام الكاميرا ووراها من إدارة إعداد إخراج فريق إنتاج زملاء ومذيعين.. كل شخص ساهم في تجربة عمر وكل شخص علمني حاجة حتى من غير ما يقصد كان فيه دعم وكان فيه احترام وده أغلى حاجة ممكن تطلع بيها من مكان".

واستكمل مراد مكرم:"أغلق صفحة مهمة في حياتي المهنية وأنا ممتن لكل لحظة فيها ومتطمن أن اللي جاي مكمل على اللي فات بخبرة أكبر وقلب هادي ونية صافية".