رانيا فريد شوقي تدعم محمد صلاح وحسام حسن: «خلينا في ضهر منتخبنا»
حرصت الفنانة رانيا فريد شوقي على دعم قائد منتخب مصر ونجم ليفربول الإنجليزي محمد صلاح وحسام حسن المدير الفني لمنتخب مصر بعد حملة الهجوم عليهما.
ونشرت رانيا فريد شوقي، عبر حسابها الشخصي على موقع التواصل الاجتماعي فيسبوك: "أنا عارفه أن البوست ده هيجبلي وجع الدماغ.. بسم الله الرحمن الرحيم.. من البداية كده خلينا نفرّق بين النقد والتجريح النقد البنّاء مطلوب ومحدش يختلف عليه لكن لما يزيد عن حدّه بيتحوّل لقسوة بتضر أكتر ما تفيد واللي بيحصل مع محمد صلاح مش مجرد اختلاف فني قد ما هو تحميل زيادة عن اللزوم مع إن منتخب كامل بيلعب والنتايج الحمد لله لسه كويسة وعارفة إن ده على أعصابنا ونفسنا نحقق حلم الثامنة".
دفاع رانيا فريد شوقي عن محمد صلاح
أضافت رانيا فريد شوقي: "صلاح مش ملاك ولا فوق الحساب لكنه إنسان بيتعب وبيغلط وبيحاول ومش منطقي يتحط عليه حمل فريق كامل ولا يبقى شماعة لأي إحباط ونجاحه الكبير بيستفز البعض بدل ما يفرّح بس إحنا عايشين حالة استقطاب حاد بقالنا فترة كبيرة كل حاجة يا مع يا ضد وصلاح تحديدًا طالع من المقاولون العرب يعني برّه الانتماء التقليدي لا أهلاوي ولا زملكاوي فبقي من غير ظهر جماهيري محلي يحميه فبقى أسهل هدف للهجوم من كل الأطراف و في ناس مصره تقارن بينه وبين أساطير في الكورة المصرية مع إن كل واحد فيهم له زمنه وتجربته وإنجازاته وهو قدر يفتح باب العالمية ويكتب اسم مصر في مكان جديد وده لا يقلّل من أي حد لأن في الآخر كلهم بنحبهم ونفتخر بيهم تاريخ مشرف باسم مصر".
دفاع رانيا فريد شوقي عن حسام حسن
واستكملت رانيا فريد شوقي: "ونفس المنطق بينطبق على المدرب حسام حسن هو كمان إنسان بيغلط وده طبيعي لكنه مدرب مصري بيشتغل بقلبه ونختلف معاه ونناقش اختياراته من غير ما نجرّحه وكمان لازم نفتكر إن القسوة مش بتقف عند لاعب أو مدرب دي بتوصل لكل لاعيبة المنتخب دول بشر وراهم بيوت وعائلات بتقرا وبتتأثر والنقد البنّاء مهم ومحدش يختلف عليه بس لما يزيد عن حدّه بيضر أكتر ما يفيد خصوصًا إن النتائج الحمد لله لسه كويسة ودلوقتي المطلوب هو التشجيع والدعم والنقد البنّاء المحترم نقد يساعد ويقوم مش يكسّر خلينا في ضهر منتخبنا للأسف لما الكورة تتحول لحرب استقطاب و مصالح المنتخب دايمًا هو اللي بيدفع التمن".